ZALEN, Mar. 28, 2026: MNF Treasurer Lalruatkima’n ZPM kaihhruai sorkarin chhiah an tipung nasa nia sawiin tihniam turin a ti a. Kawng tha nei tawh nia insawi sorkar chu kawng siam nana road cess an lak pawh titawp turin a ti bawk.

Zirtawpnia Vairengte Multipurpose Hall, Vairengtea Serlui North Block Conference a hmanpuinaah minister hlui chuan buhfai man, electric bill, tui bill a pung tih a sawi a, an sorkar hunah an ennawn dawn tih a sawi.

ZPM-in kawng siam nana petrol leh diesel-a road cess an lak pawh sawiin Rka chuan, “Hei hian bungraw phurh leh motor chuan man a tisang nasa a. Assembly House-ah ‘kawng tha kan nei tawh’ an ti a ni lo’m ni? Kawng siamna chhiah an khawn hi titawp rawh se,” a ti a. Revenue stamp man an tihto pawh titawp turin sorkar chu a ti bawk. 

Block conference-a khuallian hian ZPM sorkar hnuaiah mipuiah sum lengvak a tlem a, sumdawng leh mipui mimir pawhin an sawi nasa nia sawiin, “ZPM sorkarin mipuia chhiah lak an tihsan nasat vang leh a nghawng a ni,” a ti. 

Renenue minister hlui chuan ramri veng tura Serlui bial mipuite huaisenna ropui a tih thu a sawi bawk.

Bialtu MLA Lalrinsanga Ralte chu khualzahawm niin a bial mipuiin bial tana theihtawp a chhuahna hmuhpuia an ring ngam leh an thlang nawn leh chu lawm thu a hrilh a. ZPM sorkarah mipui an beidawng a, enchhin tlakah an ngai tawh lo va, MNF party an bel zel a, boruak thlirin kum 2028 inthlanah sorkar siam tur chu MNF bak an awm lo niin a sawi.

H. Lalthlengliana, President, Serlui North Block kaihhruai inkhawmah hian khuallianin MNF zawm thar voter 222 a lawm lut niin MNF party thuchhuahin a tar lang.