Aizawl: Sawrkara thawh chhunzawm ngiata April ni 27,2015 atanga chawnghei tan, RMSA hnuaia Laboratory Assistant leh Office Clerk te chuan thuneitute nen an inbiak rem tak avangin nimin chhun dar 12 khan an chaw nghei an titawp. Sawrkar aiawh leh RMSA atanga chawlhtir takte hi nimin khan inbiain inremna hi an siam thei a, an inremna ang chuan RMSA hnuaia Laboratory Assistant leh Office Clerk chhawr zui tak loh te chu Central atanga an hlawh hmuh leh a nih chuan Mizoram sawrkarin chhawr zui dan a ngaihtuah ang a. An chungchanga Central sawrkara theihtawp chhuaha Mizoram sawrkarin hma a lak tawhna chu chak takin a chhunzawm zel ang a. Mizoram Rural Bank-a Laboratory Assistant leh Office Clerk ten Personal Loan an lo lak tawh chungchangah RMSA leh MRB ten MoU an lo siam tawh angin hmalak a ni ang, tih a ni. Hetianga thutlukna siam a nih tak avang hian RMSA hnuaia Laboratory Assistant leh Office Clerk te chuan lungawilohna an lantir mek chu nimin chhun dar 12:00 khan an titawp ta a ni. RMSA hnuaia Laboratory Assistant leh Office Clerk te hian sawrkara thawh leh ngiatin PRISM office ah chaw an nghei a, chawngheia an nawrhna hmun PRISM Office, Upper Republic veng chu in neitute atanga chaw nghei chhunzawm an remtih loh avangin Ningani zan dar 8 vel khan insuan chhuakin New Secretariat a MPSC building bul, waiting shed ah an chhunzawm a. Zirtawpni zing dar 8 khan MSU hruaituten khawngaihin an pisa ah an insuan lut a ni. Nimin thleng khan chawnghei hi an vaiin mi 20, mipa 9 leh hmeichhia 11 an ni. Nimin khan RMSA Laboratory Assistant & Office Clerk, Joint Action Committee chuan thuchhuah siamin an inremna anga sawrkarin hna a thawh ngei an beisei tih an sawi a. An chawnghei chhunga tanpui tute chungah lawmthu an sawi bawk.