ZALEN August 27, 2026 : Vawiin Assembly Session-ah Chief Minister Lalduhoma chuan Rokunga hla phuah, “Ro Min Rel Sak Ang Che” tih hla chu Mizoram State Song atan official resolution a pu lut a, sawiho a nih hnuah lungrual taka pawm a ni.

Chief Minister chuan India ram State 14 velin State Song an nei tawh a, National Anthem leh National Song te kalh zawnga State Song neih chu a rem loh thu a sawi a. August 10, 2026-a Cabinet Meeting-ah State Song neih hi a tul tih relin, Rokunga phuah “Ro Min Rel Sak Ang Che” tih hla hi State Song atan pawm a nih thu a sawi.

He hla hian Pathian chu hnam tin chunga roreltu leh Lalber te Lalber a nih zia puangchhuakin, ram leh hnam min hruai a, inhumhima ro min relsak tura tawngtaina hla a ni a. Ram rorelnaah Pathian ram tundin a nih zel theihna tura min fuihtu leh hun khirh leh harsa paltlang thei tura rinna lerh chakna petu a nih thu sawiin, Official-a sak a nih hunah ding chungin, kutphah dinglam lung zawna dahin, rilru tawngtaina nen sa thin turin mipuite a ngen bawk.

Mizoram State Song

Aw nang, kan Lal kan Pathian,

I hming ropui ber se;

I hma a kan lo kun hian,

Kan dil ngaithla ang che.

Kan awmdan tur ngaihtuaha,

Mipui kan inkhawmin,

Finna ropui min pe la,

Ro min rel sak ang che.

I finna leh theihna leh,

I hruaina lo rengin,

Ropuina leh lalthuthleng,

An ral leh thuai si thin.

Nang erawh chu chatuanin,

Hnam tin tan kulhpui nghet,

Lalber te lalber chuanin,

Ro min rel sak ang che.

Chuvangin aw kan Pathian,

Hei hi kan dil ber che,

Kan ram kan hnam min hruaia'n,

Nang chauh kan thlang a che.

Chhung lam leh pawn lam hmelma,

Indona thleng mah se,

Hneh zel turin min pui la,

Ro min rel sak ang che.