ZALEN August 03, 2026 : Chief Minister Lalduhoma chuan tun thlaa Mizoram Legislative Assembly Session neih turah 'Ro Min relsak ang che' tih hla chu Mizoram hnam hla (State Anthem) atana pawm a nih theih nan resolution put luh a tum thu a sawi.

Zirtawpni a Tlangnuam-in India rampum huap Futsal champion an nih lawmna huna khuallian nia a telpuinaah Lalduhoma chuan, hnam hla atana an resolution put luh tur chu Assembly-ah a tlang ngei pawh a beisei thu a sawi. He hla hi hnam hla atana pawm a nih chuan sak laia awm dan tur leh zahna lantir dan tur chungchangah pawh sorkarin ngaihdan a neih tawh thu a sawi bawk.

Chief Minister in a sawi danin, hnam hla hi ding chunga sak tur niin, sak laia zahna lantir nan kut pakhatin awm khawih a, zahna lantir thlap ni se a ti a ni.

Mizoram larsap General VK Singh chuan Mizoram Legislative Assembly fur thutkhawm chu August 25, 2026 hian a ko a. Speaker Lalbiakzama kaihhruai Assembly Business Advisory Committee (BAC) chuan fur thutkhawm chhunga hna thawh tur hrang hrang leh Assembly neih hun chhung tur an la rel ang.