Mizoram chuan Road Safety Month a hmang mek a, thla thar ni 17 thleng hman tur a ni dawn a, thupui atan ‘Fimkhur la, nun humhim rawh’ tih thlan a ni a.

Kum liam ta thla 9 chhung khan lirthei chetsualna chhinchhiah 58 a awm a, 27 in nunna an chan a, hliam tuar tam tak an awm bawk a ni. Chawhrualin kar tin vawi khat aia tam lirthei chetsualna chhinchhiah tham a awm tihna a ni a, a chanve deuh thawah nunna chan an awm ziah tihna a ni bawk a. Accident vanga lirthei chhia hlutna chu thuhran nise nunna chante hlutna hi chhutchhuah tur ni ta se a tam hlein a rin-awm a, an dam-chhunga an thawhchhuah tur hlutnate, chhungkaw tawrhna, khawtlang tha leh senso dangte chhut phei chuan vawi khat chetsualah hian sum tak tak a luangral a tih ngam ang. Kum dang ang lo takin lirthei khalh fimkhur tura inzirtirna hi kumin hian tih rei a ni a, thla dawrh a awh dawn a, helamah hian zirtirna kan la mamawh viau te pawh a ni ang.

Lirthei chetsual chhan hi driver fimkhur tawk loh vangte, rui chunga motor khalh vangte leh motor that tawk loh vangte a ni fo a. Kan ram kawng hi hmun chhengchhe tak paltlanga laih a ni a, kawng kawi tak tak a awm lo thei lo a, ram leilungin a zir lo bawk nen kawng nuam leh him neih a harin a rinawm a ni. Hei vang hian lirthei khalhtu mawh pawh a sang reng a ni. Lirtheia chuang dang te nunna chu a khalhtuin a kawl rualin lirthei dangte ngaihchan a ngai a, kawnga mihring kalte pawh ngaihtuah tel a ngai a ni.

Chetsual a thlen hian mitkhap kar loa thleng a nih thin avangin a la tawng ve lo tan chuan hriatthiam a har mai thei a, mahni chunga thleng thei a ni tih hriat a tha a. Inzirtirna hrim hrim hi mahni tan ni lo, mi dang tana ngaihthlak a awl duh khawp a, tuna thla khat awh inzirtirna sawrkarin a pek hi a nihna phawk chhuak turin mitinin mahni tan i seng lut vek ang u.