Aizawl; Transport Department bultumin February ni 9-13,2015 inkar chhung hian Fimkhurna hapta '26th Road Safety Week' hman a ni dawn a, sum indaihlohna avangin kumin ah chuan District dangah hmang lovin Aizawl ah chauh he hapta hi hman a ni dawn. Kumin Road Safety Week thupui atan hian 'Himna chungchang hi sawi satliah mai lovin, i nunpui tlat ang u' tih a ni dawn a. January ni 27,2015 a Transport Minister John Rotluangliana hova State level road safety council thukhawm chuan Week hawnna leh kharna hi a hranpaa nei lovin Feb.9 chawhma dar 11 hian Assembly Annexe building ah Week puala hun hman nise, khuallian ah Transport Minister leh khual zahawm ah Parliamentary Secretary TT Zothansanga te hman nise an ti a. Week chhungin Aizawl kawn lunlai deuh ah mipuite hnenah himna lam hawi zirtirna pek nise, Road Safety Banner hi Kulikawn, Dawrpui leh Bawngkawn ah tar nise, Week thuchah hi Minister in TV leh Radio ah sawi se, Fimkhurna hapta denchhen hian Car flag siam nise an ti a, tlawmngaia lei turin motor neitute an ngen bawk a ni. Chhinchhiah danin kum 3 kalta 2012-2014 chhung khan Mizoram ah lirthei chetsualna tum 363 thlengin mi 278 an boral a, hliam 697 an awm bawk. Transport Department thawktute chuan lirthei chetsualna chhan ber 75% chu mihring vang (human failure) a ni tih an sawi a. Ruih vang te, mutthluk vang te, fimkhurloh vangte a ni tih an sawi a. A dang 25% chauh chu kawng, lirthei chhiat vang leh chhan tenau dang vanga lirthei chesual ve chauh nia an hriat thu an sawi a. Lirthei khalhtute an fimkhur chuan chetsualna tam ber chu pumpelh theih a ni tih an sawi bawk.