Aizawl: School Education Minister H.Rohluna chuan Zirtawpni tlai khan Chaltlang Venga DIET ram chhungah Mizoram Board of School Education (MBSE) building thar sakna tur lung a phum a, building sakna tur sum vaibelchhe 10 hi New Economic Development Policy (NEDP) atanga ruahman a ni. Lungphum puala inkhawm MBSE Conference Hall-a neih ah thu sawiin H. Rohluna chuan Mizoram tihhmasawn nan kawng tinrengah NEDP chu tangkai taka hman a ni tih a sawi a. “Sawrkar chuan Education a kan thil tum zinga pakhat chu naupang tan result tha neih a ni a, result tha neih chauh ni lovin quality education hi kan goal pawimawh ber a ni,” a ti. Thusawitu dang, MYC Chairman Joseph Lalhimpuia chuan sawrkarin MYC hmangin nasa takin hma a la tih sawiin thalaiten chhawr tangkai se a duh tih a sawi bawk. Ruahman dan chuan MBSE New Building hi chhawng 8-a sang a ni dawn a, garage, Conference Hall mi 150 bawr vel thut lenna te, vawi khata mi 16 phur thei Elevator te, mi 25 thut lenna tur Committee room te leh tuizem liantham tak te siam tel tum a ni.