English rock band lar Rolling Stones chuan hun rei tak hnua an album hmasa ber ‘Hackney Diamonds' chu an tichhuak ta. 

‘Hackney Diamonds' hi kum 18 hnua an album tihchhuah hmasak ber a ni a, an drummer Charlie Watts thih hnua an album hmasa ber a ni nghal bawk - fan tan chuan a hlu vet vet khawp ang le.  

Rolling Stones hian Zirtawpni khan an studio album 26-na hi an tichhuak a, an album hnuhnung ber 2005-a tichhuah 'A Bigger Bang' khan Billboard 200 chart-ah No. 3 a kai a, an album thar hian a khum thei ang em tih chu a hriat thuai dawn a ni. An album tharah hian thawhpui an nei nual a, Elton John, Lady Gaga, Paul McCartney, Stevie Wonder leh an bandmate hlui Bill Wyman te an ni nawk.

‘Hackney Diamonds' album tih lar nan hian football club Barcelona nen inremna an nei tawh bawk a, October 28, 2023-a Real Madrid nen El Clasico an khelh hunah Barca player ten Rolling Stones logo chuanna jersey an ha dawn a ni.