AS Roma chuan Paulo Dybala chu free transfer-in an lalut tih an puang a, kum thum daih contract ziah puiin June 2025 thleng a cham ang. Dybala'n Roma a thlan chhan bul ber pakhat chu José Mourinho a ni. 

Italy khawpui club Roma-in Juventus atanga free agent kum 28 mi Paulo Dybala an lakluhna kawngah hian Napoli leh Inter Milan pawh inrawlh ve-in chan ngei tumin an bei a, mahse Mourinho a zun an ngam ta lo a ni. Argentina international hian kum khat chhungin £5million a hlawh dawn bakah bonus a nei tel ang. 

Tun kar tir lam khan Portugal-ah Dybala hi a thlawk lut a, tunah hian Roma hian pre-season kalpui mekin a, Mourinho pawlte leh a team-mate te a zawm hmain medical a tih vve leh phawt a ngai dawn a ni. 

Fabrizio Romano chuan Portuguese manager leh Dybala te hi kar hmasa khan phone hmangin mimal taka an inbiak hnuah Roma zawm tur hian thutlukna a siam ta niin a sawi. An in biak naah hian Roma a kalpui tum dan Dybala hnenah hian Mourinho hian a sawi chhuak a ni. 

Roma thuchhuahin a tarlan danin club-in forward Paulo Dybala an la lut chu a lawmawm an tih thu an sawi bakah AS Roma lamah hian kum thum daih June ni 30, 2025 thleng contract an sign thu an sawi. 

Dybala chuan,“Jose Mourinho a nen kan thawk dun thei tur hi ka lawm a, he contract thlang tur hian hun ka hmang rei lem lo hle a ni," a ti. 

Dybala hian an ram Argentina-a Instituto-ah a career bul a tan a, a hnuah Palermo leh Juventus tan khel lehin Serie A champion tum nga zet a ni tawh a ni. League title bakah hian Coppa Italia tum li chawi tawhin Italian Supercup-ah tum thum a champion tawh bawk. Dybala hi 2020 khan Serie A, Most Valuable Player atan thlan a ni a, league Team of the Season-ah tum li a tel tawh bawk.