Millenium thar chuan kai dawn lai leh chuan kai hlim kum eng emaw zat chhunga khawvela footballer lar ber kha sawi dawn ila, mi tam takin David Beckham-a hming an lam ngei ang.

Khelmual ding lam sir atanga ball a vawrh luh leh freekick a pet thiam em avanga lar a nih rualin a hmel a tha a, bialnu/nupui lar tak a nei bawk a, a hun lai kha chuan khawvelah ani aia lar an awm bik lo vang tih tur a ni chiang a ni.

England captain hial ni phak kha tunah chuan pa tak tak a ni tawh a, a fapaah pawh a pahnihna, Romeo chuan a hnung zuiin football a khel ve mek a, kum khat chhung atan Brentford B team-a khel turin contract thar a ziak a, pawh sei theih turin an inrem tel.

Beckham-a hian a pa pawh neitu zinga a tel vena, Inter Miami atangin January thla khan Brentford hi loan-in a lo zawm tawh a. Coach Neil MacFarlane-a kaihhruaina hnuaiah vawi 15 a khel tawh.

“January khan Romeo hian kan squad a rawn zawm a, a thawhhlawk em em a ni,” tiin contract thar an ziahpui hnuah MacFarlane hian a sawi.

Beckham hian 2022 Major League Soccer (MLS) Next Pro season-ah khan Inter Miami II tan vawi 20 khelin a thiante thun tur vawi 10 a siamsak.

Brentford B hi kum 2016-a din chauh kha an ni a, league pawh an la khel lo va, cup chuhnaah erawh telin friendly match an khel thin bawk.

Beckham hian a pa, David a tluk dawn em tih a la hriat loh va, Victoria-i nena an fa pahnihna hi London khawpuia September 1, 2002-a piang niin kum 21 a tling ve tep a. A pa ang bawkin right-wing-ah a khel ve mek a, a pa theihna ang a nei zo dawn em tih chu hunin a la hril ang.

A naupan zual laia Arsenal academy-ah awm lai chuan full-back a ni thin a, a hnuah forward-ah insawn hmain tunah chuan a pa hman thiam hmunah a inbengbel ve ta a ni.

Manchester United-a Sir Alex Ferguson-a hnuaia inzir puitling, ‘Class of 92’ an tih zinga mi, David Beckham-a fapa hian a pa ang lo takin Arsenal a tan tlat lehnghal a, a pa pawh hian, “Ka fate hi an naupan tet atangin United kawr ngainattir ka tum vek a; mahse, pakhat chu Arsenal tantu a ni tlat thung a. Engtin nge a nih theih pawh ka hre bik lo!” a ti ve tawp.