Thomas Frank chuan Romeo Beckham chu player pakhat ve mai anga en a pawimawh thu leh England captain hlui a pa David Beckham nen a tehkhin tur a nih loh thu a sawi lang.

David Beckham chuan a fapa-in Inter Miami II aṭanga loan-a Brentford B a zawm hnua a inkhelh hmasak ber London Senior Cup-a a inkhel lai a en ve a. 

Brentford boss Frank chuan,"Romeo hi player tha tak a ni a, khawvel pum huapa mi thlir rawn a ni," tiin a sawi. Amah Romeo anga a chet chhuah theih phawt chuan hming a la chher ngei ang," a ti. 

Frank hian Denmark youth team a enkawl laia Denmark legend Michael Laudrup fapa, Andreas Laudrup a coach lai nen a khaikhin a, a khelh danah a lungawi hle a ni. 

Frank chuan,"Michael Laudrup pawh hi player zahawm tak a ni mai thei a, a fapa ka enkawl a, a pa hmingthatna lam en lovin player pakhat ve mai angin ka en tawp. Laudrup-a ang a ni lo va, amah a ni a, chutianga kan en theih chu a pawimawh hle a ni," a ti. 

Frank chuan goalkeeper David Raya pawhin January thla chhung hian a chhuahsan dawn lo tih a sawi lang a, Tottenham lam atanga ngaihven nia report awm mah se club a chhuahsan loh tur thu a sawi bawk. Kum 49 mi hian,"An ngaihven chhan hi ka hrethiam, keeper ṭha tak a nih vang a ni," tiin a sawi.