Ronaldo-a'n Manchester United chhuahsan a duh thu a sawi bakah pre season training chhungin a team-mate te bulah hun tam zawk hmang lovin club dang zawm mai tur anga ngaih theihin hun eng emaw chen hun a hmang. 

A zawm mai theih club an sawi zingah Atletico Madrid chu a langsar pawl tak an ni a, mahse heng thu thang vang hian Atletico fans te chuan an hmelma hlun Real Madrid tana khel thin Ronaldo chanchin an hriat chuan an lawm tehchiam lo. An club hlawkna tur leh an thatpuina tur lam aiin, vawi tam tak an rilru ti na tawhtu Ronaldo kha an rilruah a la thi thei lo va, an zinga tel ve turin an ngaingam lo. 

Kar tir lam khan club supporter te chuan ziakin Ronaldo lalut lo turin club hruaitute an ngen a, an club pre-season game khelh hmasak berah “CR7 not welcome” tih thuziak lian tak an keng lang bawk. Hemi chungchang hi a thlalak nen Instagram lamah pho chhuah a ni a, comment lamah Ronaldo pawh rawn lang vein emoji nui lai pali zet a tlar phei a, thu erawh ziah lan a neilo thung.