Paris St-Germain tantuten Neymar Jr chhuak turin an auh rawn a, Al Nassr lamah Cristiano Ronaldo pawh lawm lohna neuh neuh nei anga sawi a ni a. Nipui bazar rûnpui a hnai bawk a, heng thawm hi a ring zual sauh bawk.

Khawvela club hausa berte zinga mi, Newcastle United nen pawh superstar player pahnih hi sawi zawm an ni zauh zauh va; mahse, anni lei phak rual niin English club hian an inhre ve thung.

Magpies boss Eddie Howe chuan hetiang football mi lian lutukte chu an sum neihin a phak ve lo niin a sawi a ni.

Newcastle hi October, 2021 khan Saudi Arabia-a Public Investment Fund (PIF)-in leiin Arab sum an rin tak hnuah khawvela club hausa ber pawl an ni nghal a, season tharah Champions League an khelh mai hmel bawk a, inlei deuh nual tura ngaih an ni.

An khelh meknaa Neymar leh Ronaldo nghet lo anga titi a awm ruala an hming lam rik a ni pawh hi thil âwm lo a ni lo; mahse, Howe chuan, “Hetiang player hi keini lei phak rual an ni lo,” a ti tlat thung.

“Khawvela player tha ber ber an ni a. Kan dinhmunah anni ang man leh hlawh tur hi pek ngaihna a awm lo. Anni aia hniam leh thalai zawk, player thaa chhuah theih tur kan mamawh,” a ti.

Arab mi hausa sum an tlan phak hnuah Newcastle hian player lei nan £ maktaduai 250 vel seng tawhin an lak luh zingah Kieran Trippier, Bruno Guimaraes, Sven Botman, Nick Pope leh an player man to ber, Alexander Isak te pawh an tel.

An mi tharte hi an hmang tangkai thiam a, Premier League-ah khelh nga la bak chungin pathumnaah an awmpui mek a, Champions League khel pha turin an dinhmun an siam rem mek zel.

Portugal forward Ronaldo leh Brazil captain Neymar te nena sawi zawm an nih chungchangah Howe chuan, “Neitu thar kan neih atang tawhin he thil hi chu a ri tawh a. Dik tak chuan tute mai pawh hian football khawvela hming lianho hian Newcastle an pan dawn niin an ngai thup niin a lang,” a ti.

“Tunah erawh chuan chutiang chu kan kal dan a ni rih lo zel a. Sum dinhmun thlir pawhin chutiang la lut thei pawh kan ni lo va; mahse, kan zinga tel tura kan mamawh leh tha chu kan la ang,” a ti.

“Heng player pahnihte hi player tha bik an ni a, mi dang nen pawh sawi zawm kan ni a. Eng lam nge kan hawi dawn tih leh bazara kan tih theih leh theih loh chu ka hria a ni,” a ti.

Newcastle boss hian bazar chu thil khirh a nih thu leh duh apiang lei theihna a nih loh thu a sawi a. “Kan sum dinhmun leh kan player mamawh kan thlir kawp a ngai bawk,” a ti.

PSG tantuten Lionel Messi a chhuak dawn tih puan hnuah Neymar pawh chhuak ve tura a chenna in kawta pungkhawma an auh hnuah a thianpa hi zui chhuak ve mai tur anga sawina a tam hle a. Ronaldo pawh Saudi Arabia-ah hlawh tam hle mah se a hlim em em hran lo nia sawi a awm reng a, club hausa nena sawi zawm an ni ta hi thil âwm lo tak a ni hran lo.