Cristiano Ronaldo chu nikum nipui lai khan a club hlui Manchester United-ah a let a, mahse a club hlui lama a let hnu hian a beisei angin hlawhtlinna hmel an hmu mai tlat lo.

An hlawhtlin loh chhan hi Ronaldo vang a ni em kan en chhin dawn a ni. Amah tak hi chuan goal thun a la bansan lo va, PFA Premier League Team of the Year lamah a hming a lang phak bawk. Mahse, an duh ber trophy erawh pakhat mah an hlawh chhuak lo va, season tharah United hian Champions League an khel phak dawn lo bawk. 

Kum 37 mi Ronaldo hian Old Trafford a cham chhunzawm turin thutlukna a siam tawh , an interview-naah Ronaldo chuan,“United lamah hian ka la hlim rih e. Erik ten Hag hi coach experience nei tha tak a ni a, thil ropui tak a thlentir ngei ang. Mahse, a duh anga thil a kalpui theihna turin hun kan pek rih deuh a ngai a ni," a ti.

Sawi zawmin,“Kan hlawhtlin ngei ka beisei a, tha taka a hna thawk thei turin duhsakna ka hlan bawk. Kan hlim tlang a, season tharah chuan trophy kan hlawhchhuah ngei beisei ang. Manchester United hi an ropui tawh thin angin an ropui leh ngei ka ring tlat a ni. Bul tan thar tur chuan hun hi a duh rei ve thin a, mahse kei chuan kan hlawhtlin ngei ka beisei tlat thung," a ti. 

The Athletic sawi danin, Chelsea co-owner Todd Boehly chuan Ronaldo hi lakluh tumin a bei ngawrh hle a, a agent Jorge Mendes pawh a hmu hial. Mahse, United lam hian an number 7 hi chhuah an tum lo hle thung. 

Stat lama a lan danin Ronaldo-a'n inkhelh bul a tan hian, an win rate leh game tina an point hmuh average chu a sang zawk zel a, season liam ta khan Portugal international hi United tana goal thun tam ber niin goal 24 a thun bawk. Mahse, starting XI-a a tel loh hian United defensive record hi a tha zawk hret thung. 

Tun tumah hian 2021-22 season-a Ronaldo starting XI a luh leh luh loh United record kan khaikhin dawn a ni. 

Ronaldo-a'n a start-in          Ronaldo-a'n a start lovin
Game: 35                                 Game: 14
Chak: 17                                  Chak loh: 3
Draw: 7                                    Draw: 7
Chak loh: 11                            Chak loh: 4
Point per game: 1.65               Point per game: 1.14
Chakna rate: 48.5%                 Chakna rate: 21.4%
Chaklohna rate: 31.4%            Chaklohna rate: 28.5%
Goal thun zat: 55                    Goal thun zat: 16
Goals per game: 1.57              Goals per game: 1.14
Goal chhuah zat: 50                Goal chhuah zat: 19