Premier League table-a pahnihna Liverpool leh top four beisei Manchester United te chu nizan zanlai khan an inkhel a, chhiat tawh vanga C. Ronaldo tel lohna United team chu awlsam takin Klopp-a leh a pawl ten an hneh. Hun tawp hamrik a rikin meuh chuan, inkhelh chhunga ball 76% lai changtu Liverpool chuan 4-0 zetin Machester United an hneh. 

Premier League hmahruaitu thar Liverpool hian khelh 32 atangin point 76 an hlawh chhuak a, khelh 31 khel Manchester City aiin point hnihin an sang rih. Champions League khelh phak ngei tum United chuan khelh 33-ah point 54 neiin paruknaah an tang rih. Manchester City hian Nilaini-a  Brighton an hmachhawn hunah an dinhmun ngai luah theihna hun tha an nei leh nghal dawn a, Jurgen Klopp-a naute an umna kawnga pressure sang tak vang hian an chesual ve khut thei bawk. 

An inkhelh hmain Man United chuan thuchhuah siamin lusun hlim an star player Cristiano Ronaldo tel loh tur thu thuchhuah an siam a,"Thil dang zawng aiin chhungkua hi a pawimawh zawk, Ronaldo hian a fapa a chana hun harsa tak a tawng mek a ni. Chuvangin, Liverpool khel turin Anfield lamah a zin ve lovang. Tin, an chhungkua hian fianrial an mamawh rih hle a, chim buai rih lo turin mipuite kan ngen bawk a che u," tiin an ziak. Kan hriat angin kum 37 mi Ronaldo leh a kawppui Georgina Rodriguez te chuan fa phir mipa leh hmeichhia an nei a, a mipa zawk hi nimin khan a boral lehnghal a nih kha. 

Inkhel chu
Inkhel an tan chauh tihin goal hum tum tih hriat taka inrem United lam an bet nghal a, an tih thin dan pangaiin Liverpool lamin an nawr nghal. Minute 4 na chauhah Salah chuan mual dinglam atangin ball tha zet mai L.Diaz a pe a, a nin awlsam takin goalah a lo chantir.Goal hnih khungtu Salah chuan a goal hmasa zawk chu minute 21 naah a thun a, Liverpool lamin si hnihin hma an hruai a, first half-ah goal dang a luh belh lo. 

Second half tan a ni a, Liverpool bawk an chungnung leh, minute 67-naah Mane rawn che chhuak vein counter-attack a rawn hmang tangkai a, Diaz-a siamsak hmangin Mane chuan Liverpool goal thumna a rawn khung ve leh. Hun tawp dawn minute 6 chiah a awm tawh tihin Diogo Jota ball siam sak tha zet chu Salah chuan goal-ah chan tir ve lehin 4-0 in inkhelh a tawp. 

He inkhelhah hian minute 9-naah Pogba a inhliam a, minute 11 naah goal hmahruai thuntu Diaz chuan a head lut teuh hle bawk. Minute 34-naah Diaz-a bawkin goal a khung, mah se offside a nih vangin goal a pawm a ni lo. De Gea-a'n Diaz-a long shot a dang hlauh. Minute 58-naah Bruno Fernandes chuan free kick a pet a, Alisson-a'n a lo dan sak a, hun tawp dawnah H. Mejbri leh Bruno Fernandes ten yellow card an hmu. 

Line-ups
Liverpool XI: Henderson, Thiago, Matip, Alisson, Salah, Van Dijk, Mane, Fabinho, Robertson, Alexander-Arnold, L. Díaz
Subs: Milner, Origi, Joe Gomez, Naby Keita, Tsimikas, Jota, Kelleher, Konate, Curtis Jones

Man Utd XI: Matic, De Gea, Jones, Lindelof, Pogba, Maguire, Bruno Fernandes, Dalot, Rashford, Wan-Bissaka, A. Elanga
Subs: Mata, Alex Telles, Lingard, Bailly, Dean Henderson, Sancho, McTominay, H. Mejbri, Alejandro Garnacho