Cristiano Ronaldo chuan a kawppui Georgina Rodriguez-i'n fa phir a pai thu Instagram kaltlangin a puang. Instagram-a follower ngah ber Ronaldo hian Ningani khan Instagram-ah Georgina nena an thlalak chu pholangin, aultrasound an tihna thlalak an keng va bawk. Caption-ah 'Expecting Twins' tih a hmang a, a post hi mi maktaduai 29 chuang zetin an like tawh a ni. 

Footballer piang tawh zinga ropui ber pawl Cristiano Ronaldo hian fa pali nei tawhin, a upa ber Cristiano Junior chu June 2010 khan a piang. 2017 khan phir - Eva leh Mateo te an nei leh a, hemi kum vek hian Georgina nena an fa pakhatna ni turin Alana Martina chu a piang leh bawk. Tunah phir an pai leh a, tluang taka an nei thei a nih chuan fa paruk a nei dawn tihna a ni - chhangchhe pa dik tak a ni tawh dawn! Georgina Rodriguez nen bik erawh fapathum an neihna tur a ni ang. 

Hetih lai hian Ronaldo hian 2017 khan France Football hnenah fa pasarih neih a duh thu a lo sawi tawh a, a duhthusam puitlin turin pakhat chiah a ngai tawh tihna a nih chu. CR 7 hian fa pasarih a duh kher chhan hi hriat ni lo mahse, a jersey number duh ber pawh 7 a nih avangin fa pawh pasarih neih a duh a ni thei ang.