ZALEN December 11, 2024 : PM-Surya Ghar Muft Bijli Yojana (PM-SGMBY) hnuaiah Rooftop solar bun duh te tan central sawrkar chuan puihna cheng 45,000 atanga 1,65,800 thleng a pe thei dawn a, In chunga solar bun duh tan pmsuryaghar.mizoram.gov.in ah dilna theh luh theih a ni.

Mizoram-ah hian hetiang rooftop solar bun thei company hi 12 an awm mek a, a company-a zirin an rate erawh a inang lo a, 1kWp bun duh tan hian company zinga a titlawm ber chuan cheng 77,000-in an bun sak thei a, subsidy pek an ni chuan cheng 32,000-in an bun thei dawn tihna a ni. Hetiang zat chiah watt hi company thenkhat chuan 1,00,930 ti te pawh an awm tho a, bun man hi company hrang hrang te lak dan a inang lo a ni.

Rooftop solar hi heng mizoram-a company te hian 1kWp atanga 10 kWp thleng an bun sak thei a, a watt a zir hian a bun man a inang lo a, chubakah AMC huamchhung leh an bunna tur hmun a zirin subsidy pek zat hi a inang lo thung.

Rooftop solar hian a hranpa-in battery a nei lo a, rooftop solar ten power an siamchhuah hi a neituten an hman hnua hman bang an la neih chuan grid (electric department hrui) a thawnchhuah a ni ang a, P&E lam chuan heng kawlpheta thawnchhuah zat (unit) hi a lo chhianchhiah dawn a ni. Heng unit thawnchhuah zat leh mimalin current an hmanzat chu electric bill-ah an siamrem (adjust) thin dawn a ni. Hmaral aia thawnchhuah a tamna unit hi Financial Year tawpah P&E Dept.-in Unit khatah cheng 4.82 in an leisak zel dawn a ni.

India rama National bank ten he scheme hnuaia Rooftop Solar bunna tur atan consumer hnenah loan an pe thei a. SBI leh Mizoram Rural bank te pawhin loan hi an pe thei a, a dilna pawh hi National Portal-ah a awm bawk a mo, Kilowat lak duh dan a zirin Cheng nuai 2 atanga nuai 6 thleng loan hi pek theih a ni a, watt duh zat a zirin loan rulhna percent a inang lo a, kum 10 thleng loan rulh chhung hi pawhsei theih a ni. Hrechiang duh tan P&E Dept.-ah zawhchian theih a ni.