Tottenham striker Harry Kane hi kum 29 chauh a la ni a, pangngai takin kum ruk kum sarih vel la inkhel thei tura ngaih a ni.

Inrinni zan khan Wayne Rooney khumin Premier League-a goal thun tam ber pahnihna a ni ta a, a um leh mek chu Alan Shearer a ni.

Rooney nge ropui Kane?
March 23, 2023 khan Kane hian England tana a goal 54-na thunin Rooney tho khumin Three Lions tana goal thun tam ber a ni thar tawh.

Ni 44 a liam a, Inrinni zan khan Crystal Palace lakah Walthamstow-a piang, Kane hian tauh lutin Everton leh United forward hlui bawk a khum a, Premier League-a goal thun tam ber dawttu a ni leh a, goal 209 a thun ta.

Kane hian tun season-ah goal 26 a thun ta a, Premier League-a season 10 a hman tawha a chet that ber pathumna a ni a, tun season-a a tauh luh vawi 10-na a ni bawk a, a aia tauh luh hnem an awm rih lo.

Kane-a hi season khata a chet that ber chu 2016-17 leh 2017-18 niin vawi 30 khelhah goal 29 a thun leh vawi 37 khelha goal 30 bawk a thun kha a ni.

Rooney-a khan a vanglaiin Premier League-ah season hnih chiah goal 20 chuang thun a nei a. 2009-10 khan goal 26 thunin 2011-12 khan khelh 34-ah goal 27 a thun bawk.

Kane-a buk rit zawkna chu Rooney chuan season 16 zet khelin goal 208 a thun a, Kane erawh chuan season 10 chiah hun a la hmang.

England captain sawi nep duhtu tan erawh Rooney-a goal-te hi chuan Premier League medal a chhawm bik tlat a, Kane chu goal thun thei hle mah se nomawi a keng ve tlat lo.

Rooney aiin khelh 177 zetin a khel tlem zawk chungin a goal thun zat a khum tawh tlat thung a, tunge striker tha zawk tih hi inhnial theih tak a ni.

Shearer a um mek
Kane-a chunga awm chu Premier League-a hming dai tawh lo tur, Shearer a ni a, ani hian goal 260 zet a thun.

Palace laka a tauh luh thleng khan goal 51-in a la phak lo va, tun ang renga goal a thun thei a nih chuan 2025-26 chuan khum thei tura ngaih a ni.

Premier League-ah season 10 a hmang tawhah season tin goal 20.9 vel thun zel ang a ni a, a kal chak dan chhutin England legend hi a khum ngei a rinawm hle.

Blackburn Rovers champion-puitu khum tur erawh chuan a inhliam loh erawh a ngai dawn a, Premier League atanga a chhuah loh a ngai bawk.

Sapho chuan Manchester United-in an duh ngawih ngawih tih an sawi a, Bayern Munich pawhin Robert Lewandowski thlaktu atan an duh hle tih sawi a ni a; mahse, Bundesliga giants hian tun hnaia Randal Kolo Muani lam an hawi a, Spurs chairman Daniel Levy pawhin a goal thun khawl hi chhuah loh a tum.