Ropeway leh Skywalk project tih hlawhtlin nan chhui ngei nise

Admin - Oct 31, 2021

Nuai 1400 chuang riral ringawt thlir liamtu nih chu tumahin an duh a rinawm loh a. Minister sawi ang hian Lok Ayukta emaw CBI kutah dah ni sela chhui chhuah a nih hnuah project hi tih hlawhtlin ngei a ngai a ni.

Tuirial bial bye election campaign laiin Tourism Minister leh MNF Adviser ni bawk Robert Romawia Royte chuan Skywalk leh Ropeway siam project ah thil dik lo awm nia sawiin Lok Ayukta emaw CBI kuta pek mai an ngaihtuah mek niin a sawi a. Congress party chuan rawn chhang ve lehin he project hi chhui ngei nise an rawn ti ve leh bawk.

Minister sawi dan chuan Chaltlang leh Durtlang inkara ropeway siam turah  hnathawh hmain Rs Nuai 1200 release a ni a. Sakawrtuichhun skywalk atan pawh a thawktu hnathawh hmuh tur awm mang si lovin Rs Nuai 245 lak chhuah a ni bawk a. He thil hi 2018 hmalam Congress sawrkar hunlai a thleng nia sawiin hetianga hnathawh hmuh tur awm si loa sum lakchhuah a nih vang hian ministry lam pawhin sum an pek belh duh tawh lo niin a sawi a. Dan anga chinfel a nih hnuah project chu chhunzawm theih a nih tur thu a sawi bawk a ni.

Congress party chuan he thusawi hi chhangletin Skywalk project chu MNF sawrkar tawh hnu 2019 ah pawh la thawh niin May, 2020 ah pawh Tourism e-book ah sawrkar hmalakna kal mek anga ziah a nih thu an sawi a. A project khaihlak chhan ber chu a changtu minister in a hriatchian ber tur thu an sawi a ni. 

Thu inkalh a awm ta a, tourism minister ni mekin pawisa chingpen hun chu Congress hunlai niin a sawi a, Congress lamin MNF sawrkar tawh hnuah pawh thawh chhunzawm zel a nih thu tan chhan tha tak nen an sawi bawk a, mipui tan thudik hriat a har ta hle mai a.    

He thu hi thil te lo tak mai a ni a, chhui chian ngai a ni. Hnathawh awm mang lo si loa Nuai 1400 chuang riral ringawt thlir liamtu sawrkar nih chu tumahin an duh a rinawm loh a. Politic a inbeihna satliah anga thamral atan chuan a uiawm hle a ni. He project hi kan ram khualzin hip thei a nih bakah tual chhung mite tan pawha thil tangkai leh hawi thaw venna hmun thengthaw tha tak tur a ni a. Tourism Department  Minister in a lo sawi tawh ang hian he thil hi chu a nih dan tak hailan a tha khawp mai a, a sawi ang hian Lok Ayukta emaw CBI kutah dah  nisela chhui chhuah a nih hnuah  project hi tih hlawhtlin ngei a ngai a ni.

Share now