Heti khawpa hlemhletna hua nisi enga ti em em nge keini ram ang, mipui pawh tlemte awmnaah kan lungawina thlen thei hian roreltu kan thlan fuh theih reng reng loh le aw? Kan rama buaithlak ber chu ram rethei kan ni tlat hi a ni. Hei hian pawisa hmanga thlem awlsamna leh mahni hmasialna ruamah min hnuk luta, inthlan dawnah pawh manifesto ai chuan hlawkna kan hmuh theihna party apiang kan vote mai. Kan sikul kal ve laia kan zirtirtuten min fuihna survival of the fittest tihte kha tunah chuan survival of the politically fittest a ni daih tawh mai. Party tinten manifesto tha tak tak an nei thin. Heng manifesto-ah te hian mi rethei chawikanna a tam ber thin. Mahse, a tak takah chuan mi rethei an rethei tial tial a, mi hausa an hausa thur thur bawk si. Kan ram han bihchian hian mi hausaten hausak zel an duh a, mi retheiten hausak kan châk tih a chiang. Chuvangin, hausate hausak zel theihna tur thei leh retheite tihausa thei bawk tur manifesto hi kan ram hian a mamawh ber a ni mai lo maw? Kan kan lungawi tlang viauin a rinawm tlat. Mizoramah sorkar hna thawk leh thawk lo pawh, BPL family leh mi hausa te pawh kan thawhchhuah let tam takin kan che tlat a. Hei hian sum mamawhna a tipung a, sum menin kan meng vek a. Inthlanah pawh hian mipuite sum hmanga thlem thei apiangin vote an hmu tam a, vote hmu tam na na na chu an tling leh mai thin. Roreltu leh eiruho, an hnunga rel reng chunga tlawn huam huam tho si mipuite hian Politician leh mi hausa te, Kohhranten Biak In lama kan dawnsawn dan thlenga kan inthlak danglam hma chuan kan rama roreltute eiruk leh hnathawh that lohin ram a tihbuai theih dante hahip sawi hi bansan ang u. Pathian malsawmna dawng tlakin taima leh rinawm takin hnathawk ila, mahni thawhchhuah phu tawka sum hman kan inzir tawh ang u. Hetianga kan khawsak thiam phawt chuan sum ngainatna kan nei tlem ang a, party-ten min thlemna thang a per thlawn ang a, mi dik tak kan thlang tawh mai dawn a ni. Roreltu tha, rinawm leh ram hmangaih nei tur chuan roreltu siamtu mipuite kan that ve te, kan rinawm ve te , ram leh hnam kan hmangaih ve a ngai. Ram rorel tura kan thlanchhuahte hi sawi sel mai lovin, kan nihna dik tak phochhuahna darthlalang an ni tih leh Kan phu tawk zel Pathianin roreltu min pe mai zawk a ni zawk tih hi pawm ngam ila, insiam tha ang u. Mizoram hmasawnna leh chhiat mek na chhan hi keini mipui, Mizoram mihringte ngei hi kan ni tih hi pawm ngam ang u. Roreltu tha nei tur te, eirukna leh hlemhletna chi hrang hrang te tireh tur chuan mipui kan pawimawh ber tih kan hre ngamin kan pawm ngam dawn em le?