Aizawl; NLUP Implementing Board (NIB) Chairman J.H.Rothuama chuan Zirtawpni khan Tamdil-a Fishery department enkawl Fish Hatchery a tlawh a. Saitual leh a chhak lam biala NLUP beneficiary te leh sangha dil siamtu ten sangha chi hnianghnar zawka an hmuh theih nan he Hatchery tih changtlunna tura hma lakna tur pawimawh te a enfiah. Tamdil Hatchery ah hian sangha chi nuai 6 thleng dah theihna Nursery 15 sq metre 2,000 a zau a awm a. Rearing Tank 6 awmin tum khatah sangha note 67,500 a dah theih a. A chi thlah tur sanghapui dahna ‘brooder’ 2 a awm bawk a ni. He hatchery atang hian kum 1 ah vawi thum sangha note a thar theih mahse beisei zat erawh an la thar thei lo. NIB Chairman hian Fishery department hotu te nen ruahmanna an siam nghal a. Brooder siam belh, Vairengte atanga sangha pui tam zawk lakna tur leh tui canal laih thuk belhna tur leh hatchery kal pawhna lei siamna tur te an rel a ni.