Bollywood film hit zet mai 'RRR' a chang British actor Ray Stevenson chu Pathianni khan kum 58 mi niin a boral. 

Northern Ireland-a piang Ray Stevenson hi Thor leh Star Wars-ahte pawh a lo inlan tawh a, lemchan lamah sulhnu ropui tak a hnutchhiah. A thihna hi Italy a ni a, a thih chhan erawh tarlan a ni lo. 

Ray Stevenson han film thahnem tak a chang hman a, King Arthur bakah Punisher: War Zone-ahte pawh khan a inlan. Chirs Hemsworth channa Thor movi pathumah khan a inlan vek bawk a, Marvel movie-a a inlanna hnuhnung ber chu Thor: Ragnarok kha a ni nghe nghe.

Ray Stevenson hi Indian filmmaker lar SS Rajamouli film 'RRR' ah khan a inlan a, Governor Scott Buxton role a play. Bollywood actor lar Ram Charan leh Junior NTR te nen chang hoin hming a chher hle.  'RRR' hi tun hnaia Bollywood film chhuakah chuan sum lalut hnem leh lar berte zinga mi a ni. 

Star Wars series Ahsoka-ah pawh a inlan a, mahse a chan zawh hmain a boral ta a ni. Ray Stevenson hian uitu a ngah a, a thih thu hian lem chan khawvel a barakhaih tak zet a ni.