February 21,2023; Assembly speaker Lalrinliana Sailo chuan Assembly official te hmuh danin, sports minister Pu Robert Romawia Royte-in thudik a sawi zawk tih a puang.

Vawiin Assembly Budget Session zawhna leh chhanna hun zawh hnuah, nimin lama Serchhip bialtu MLA Lalduhoma leh sports minister te inhnialna chungchang a Assembly secretary lamin hma an lak dan speaker in a sawi a, house chhung chauh an thlir thu sawi bawkin, "Ni 10.2.2023 a proceeding a alan dan leh officer te hmuh danin Pu Robert Romawia Royte hian thudik a sawi zawk a ni," a ti.

Hemi hnu hian ngaihdam dilna thu sawiin, Lalduhoma chuan, Miriam Lalnunsiami damloh chungchang leh inkhulchhuah dawn a an buai zia te, a thiante zarah a inkhulchhuah tak dan te house ah a lo sawi chhuak tawh tih sawiin, "Zan lamah social media ah inhnialna a chhuak a, chumi leng vel leh house chhunga kan thusawi te kan lo ngaihfin palh a, hre reng chunga tilui ka ni lo a, ka hriatsual palh liau liau a nih avangin kan minister zahawm tak chungah ngaihdam ka dil a, nangmah (speaker) leh member zahawm tak takte leh mipuite ngaihdamna pawh tih takzetin ka dil a ni," a ti. 

"Nimin ah kan minister zahawm takin Miriami nen kan inbe lo tih uar takin a sawi a, mahse social media lamah an inbiak zia te a lo lang nasa a, a hriat sual palh ah ngaihsak i la, ngaidam ve tho i la ka duh," ti bawkin, "Mihring famkim lo kan ni a, tu kan session ah hian kan thu khel a nawi mah mah a, mipuite pawh an zahawm a, he chapter hi titawpin, inngaidam tawh ang u," a ti bawk.