ZALEN March 31, 2026 : Mizoram Rural Bank chuan Corporate Social Responsibility (CSR) kaltlangin vawiin March ni 31, 2026 khan Computer 32, printer 4 leh Smart Interactive Board pakhat chu hmun li ah an hlan. CSR kaltlanga Mizoram Rural Bank luan chhuahna hi Rs.19,94,220/- man hu zet a ni.

Thilpek inhlanna pui ber hi Mizoram Rural Bank Head Office Board Room ah neih niin V. Lalrinmawia, Secretary CSR Committee in thilpek inhlanna inkhawm hi a kaihruai a. Mizoram Rural Bank chuan Bank profit atanga chhuta CSR kaltlanga pawl, khawtlang leh Sawrkar Office hrang hrang tana an luanchhuah thin tawh thu leh kumin pawh hian Nuai za chuang hmanral anih thu a tarlang. 

He hunah hian Computer Set 24 leh A3 printer 1 chu Industrial Training Institute, LESDE Department ah hlan a ni a. Heng thilpek te hi Sheryl L Vanchhong, Chairman MRB chuan hlanin, PC Lalhriatpuia, Principal ITI in LESDE Department aiawhin a dawng a ni. Tun hnai deuh atang khan ITI hi Sawrkar laipui lam atanga tihchangtlun chhoh mek niin, tunah hian Skill laboratory tha tak buatsaih a ni a. He laboratory hi Mechanical Engneering, Electrical & Electronics Engineering kaihhnawih Simulation atana hman tur a ni.

Hemi rual hian Mizoram Journalist Association (MJA) te hman turin Computer set 5 - Sheryl L Vanchhong hian a hlan nghal bawk a. MJA aiawhin C. Lalrambuatsaiha leh OB dangten an dawng a ni.

Vawiin vek hian HATIM (Higher and Technical Institute of Mizoram), Pukpui, Lunglei hnenah Smart Interactive Board (65 inch) chu hlan a ni bawk a. Dr. R. Lalnunthara, Principal, HATIM chuan thilpek hi lo dawngin T. Hmingthantluanga Tonson, Regional Manager, Network - 2 in a hlan a ni.

SP Office, Champhai a hman turin Computer Set 3 leh Printer 3 chu Alan Hmangaihsanga, MPS, DSP (Hqrs.), Champhai DEF hnenah C. Lalsanglura, Chief Manager, Champhai Branch in a hlan bawk a ni.

#zalen#mizoramruralbank#csr