October 27, 2023; Rs. 1,06,90,916 tihchingpen thubuai ah Lydia Lalhruaitlungi, LDC (Muster Roll), Law and Judicial Department a thawk thin chu, Aizawl District Court a Special Judge (Prevention of Corruption Act) Dr. HTC Lalrinchhana'n thiamloh chantir a ni. October ni 30, 2023 ah hremna puan a ni ang.

THUBUAI KIMCHANG :

He thubuai hi dt. 24.9.2018, ah Pi Lalhlimpuii Hmar, Under Secretary, Law and Judicial Department, Govt. of Mizoram in ACB Police Station ah FIR a thehluh atang irhchhuak a ni.

   ACB Police te hnuchhuina a tarlan a nih dan chuan Pi Lydia Lalhruaitluangi, chutihlaia LDC (Muster Roll), Law and Judicial Department a mi chuan Law and Judicial Department a a thawh hunchhung ah December, 2015 atanga August, 2018 chhung khan Department sumpai a tam berah chuan sawrkar Ukil te hlawh tur ‘Professional Services’ tih hnuai atang te in office Bill lem te, sanction order lem te, a chunga thuneitu te hming sign lem te leh cash memo lem te hmangin Rs 1,06,90,916/- (Vaibelchhe khat, nuai sawmruk pakua, zakua leh sawm paruk) zet chu a nu leh pa te leh a laizawn te Bank account ah te dah lutin ama mimal tan a lo hlemhlet pui a, a nu leh pa leh a laizawn te pawh thubuai ah hian rinluh an ni ve nghe nghe.

   Thubuai ngaihtuahna ah hian sawrkar lam thuhretu mi 24 te thu zawhfiah an ni a, tin, lehkha leh tul dang pawimawh 308 zet phawrh (Exhibit) a ni nghe nghe. Hetianga thuhretute thusawi leh lehkha pawimawh te ngun taka buk a nih hnu ah Court hian Pi Lydia Lalhruaitluangi hi sawrkar a a mawhphurhna ama tana hmankhawlohna section 13 (1) (a), (b)/13(2) P.C. Act, 1988 te, a kuta mawhphurhna ama mimal tana hman khawlohna section 406 IPC ah te, pawisa chungthu ah a chunglama thuneitu te bumna section 420 IPC te, inbumna tur atana lehkha lem siam section 468 IPC te leh lehkha pawimawh lem a dik tak anga hmanna section 471 IPC ang te in thiamloh chantir a ni a.

   Chutihlaiin, a laizawn Lalhlimpuii te, a nu Pi Zothansangi leh a pa Pu Lalhnehliana te erawh chu dan a bawhchhiatna kawngah Pi Lydia Lalhruaitluangi lo puibawm a puhna ah ACB lam hian finfiahna thatawk an neilo a ngaiin hemi thubuai ah hian thiam chantir an ni thung.

   Pi Lydia Lalhruaitluangi hi he a hna atang hian dt. 21.08.2018 khan maipar thlawn tir a lo ni tawh bawk.