ZALEN Sept. 18, 2025 : Lunglei Synod House sak thatna tur lungphum chu Synod Moderator, Rev. R.C. Lalnghakliana’n nimin khan a phum.

Lunglei Synod House hi kum 1990-a sak tawh a ni a, a building a hluiin a him tawk tawh lo nia hriat a ni. Chhim Bial Committee chuan Synod Trust Committee-ah sak that dilna a thlen a, hmalak chhoh a ni ta a ni. Building sak that tur hi Mizopa chhiara chhawng ruk tur a ni a, zawm belh leh theih tura ruahman a ni.

First Floor-ah hian Synod Office a awm ang a, Ground Floor-ah Parking Area, Store Room leh Canteen a awm ang a, Basement-ah Drivers & Chowkidar Quarters leh Store Room a awm ang. Second Floor-ah hian Administrative Quarters, Guest Room 2 leh Store Room 2 dah a ni ang a, Third Floor-ah Hmeichhia leh Mipa tan Dormitory leh Guest Room 2 leh Fourth Floor-ah hian Conference Room leh Store Room te a awm ang. 8 Passenger Lift pakhat dah tura ruahman a ni bawk. 

Lunglei Synod House Building sak that nan hian Rs.17,98,66,000 ruahman a ni a. Plan & estimate hi Xc-Land Design Studio, Ramhlun North, Aizawl-te siamtir an ni a, building sa tur hian Upa R. Lalnunthara, Lunglei Chanmari thlan a ni a, a sak hna hi November 3, 2025 ah tanin thla 42 chhunga sak zawh tur a ni ang.