Aizawl: Sawrkar laipuiin mi harsate tana damdawi ina a inenkawlna senso bill theihna tur, RSBY thlakna atana an duan Rashtriya Swasthya Suraksha Mission (RSSM) tia lo vuah tawh chu sawrkar laipuiin a hming vawihnih lai an rawn thlak hnuah a hming rawn cancel leh a ni a, tunah hian hming a nei rih lo a, hetih lai hian sawrkar laipui tum angin August 15, 2018-ah hawn tum niin Mizoramah chuan mi nuai 1.9-in hamthatna an dawng dawn. Health & Family Welfare (H&FW) department hotute chuan Zalen zawhna chhangin August 15, 2018 ah hian state tam tak an inpeih hman dawn loh thu an sawi a. Heng zingah hian Mizoram pawh an tel a ni. Prime Minister hian August 15-ah roll-out programme nei dawn mah se hei hi enchhinna tur a nih thu leh pilot basis-in India ram district thenkhatah chauh tih a la ni rih dawn a, Mizoram chhunga district-te an tel ve lo niin H&FW hotute chuan an sawi bawk. State tinah chuan October 2, 2018-ah hman tan a  nih tur thu sawiin Mizoram bikah chuan insurance mode-a kalpui an tum thu department hotute chuan an sawi a. Insurance company-te hnenah tunah hian tender sawrkar chuan a chhuah mek a ni. He scheme thar hnuaiah hian chhungkaw pakhatin kum khatah Rs. 5,00,000 thleng damdawi ina inenkawlna senso an bill thei dawn a. Hei hi sawrkar damdawi in zawng zawngah leh empanel private hospital zawng zawngah a bill theih dawn a ni.