Sawrkar laipui chuan khua leh tuiten sawrkar hmalakna an hriat theihna atan te, langtlang leh eiruk awm lo sawrkar a din theihna atan Right to Information dan a siam a. Kum tin ram pum huapa October 5 -12 chhung Right to Information (RTI) Week hman thin chu kumin pawh hman leh mek a ni a, he hapta hi Thawhtanni khan Chief Minister Zoramthanga chuan Synod Conference Centre-ah a hawng a ni.

Kumin hi Mizorama RTI Week hman vawi 9-na a ni a. RTI (Right to Information) Act, 2005 hi India khua leh tui zawng zawngten naupang atanga puitling, Non Resident Indian thleng huam telin an hmang thei vek a, kum bithliah a awm lo a ni. Mipui leh sawrkar inkar zau lutuk tur hnuhhnaih nan te, information dil leh pekchhuah nan te a tangkai em em a. Chutih rual chuan venhimna thil leh engemaw bik erawhchu a huam lo thung a ni. Hapta hi RTI hnuaia mipuiin an chanvo an hriatchiana an hman tangkai thar leh theih nan a siam a ni.

RTI hi Mizoramah pawh kan hmang tangkai chho ve zel a, hei hian sawrkar hnathawkteah fimkhurna a siam bakah eirukna thleng thei nasa takin a veng bawk a ni. Chutih rual erawh chuan tuna kan harsatna hrang hrangte hi chik lehzuala sawrkarin a ngaihtuah a, a chinfel dan kawng a zawn a pawimawh hle.

A hmasa berah chuan department officer-te hi an inthlak ve reng thin avangin zawhna chhangtu tur SPIO-ah hian a changin harsatna a awm deuh thin a; chuvangin, SPIO tur hi chu a theih chin chinah sawn ve mai loh tur officer dah ni thei se a duhawm hle. RTI hmanga zawhnate hi hun ruat chhunga chhan tur a ni a, chutih rual chuan department lam hian chhanna hi peih tawh mah se hun ruat ni hnuhnung lama chhanna hi pek an tum deuh zel em ni tih mai turin an pe har deuh thin a, hetah hian department lamin tan an lak thar a tul hle.

Hei mai bakah zawhna zawttu in a hriat duh te a zawh hian a chhangtu lam hian chiang leh felfai tak ni lo deuh, tlema pehhel leh fiah lo deuha chhan hi an tum thin em ni tih mai turin tlanglawn deuhin chhanna pek a ni fo bawk a, hei pawh hi chiang leh zuala chhan theih atan a tha hle.

RTI hi intihmualpho tumna hmanrua atan hman chi a ni lo a, mipuiten an chanvo leh hriat duh an neihte dan hmanga an hriatna tur a ni a. Hetih lai hian department thenkhat hi chuan zawhna zawttute hi an lawm lo deuh thin. Zawhna chhangtu tan pawh thil dik lo a awm loh chuan chhan hreh tur a awm lo a ni. RTI hi tun ai hian hman tangkai lehzual tum ila, kan rama hlemhletna tam tak hi chu a umbo ngei a rinawm e.