RTI: Placement agency 29-te license sut tawh, an hming nen

ZALEN, June 9, 2024 : Mizoram sawrkar chuan ram danga hnathawk tur thawnchhuaktu agency zingah dan zawm loh vangin mi 29-te license a sutsak (revoke) tawh.

ZALEN RTI zawhna, State Public Information Officer, Aizawl DC Office-in a chhan danin ‘The Mizoram Private Placement Agencies (Regulation) Act 2015’ hnuaiah agency 44-te hnenah ram danga hnathawk tura thawn phalna license pek an ni tawh tih a sawi a. Agency-te phalna pek an nih thin dan chungchang zawhna chhangin ‘License diltute hi police verification neih vek a ni a, an hnen atanga ‘no objection’ dawna fee Rs. 5,000 an pek bakah bank guarantee-ah Rs. 1,00,000 an dah chuan phalna pek an ni’ tih a sawi.

Ram danga hnathawk tur thawnchhuak zingah sawrkar pawmpui loh (Aizawl DC hriatpui loh) a thawnchhuak agency pahnih, Cherys Agency leh Blessing Agency an awm tih an tar lang bawk.

Aizawl DC Office-a SPIO chuan ram danga hnathawka chhuakte hi Hongkong, Macau, Malayasia, Oman, Singapore leh UAE-ah te an thawk tih sawiin heng zingah hian awmpui ‘housemaid’ an tam ber a; a dangte hi hotel, nursing home leh healthcare assistant etc. te an ni tih a sawi.

Mizoram atanga ram danga hnathawk awm zat sawrkarin a chhinchhiah leh chhinchhiah loh zawhna chhangin SPIO chuan ‘Agency-te hi The Mizoram Private Placement Agencies (Regulation) Act 2015 Sec. 8 (1)-in a phut angin hnathawka an thawnchhuahte, an thawn chhuah atanga ni sarih chhungin DC office-ah thehlut tura hrilh hriat an ni a. An rawn thehluh thin loh avangin chhinchhiahna mumal a awm lo’ niin a sawi.

Agency-ten hnathawka an tirh chhuahte hnen atanga pawisa an lak zat chu office lamin an hriatpui lo tih sawi bawkin The Mizoram Private Placement Agencies (Regulation) Act 2015 chu siam that (amend) tura ruahman mek a ni tih RTI chhannaah hian a tar lang bawk.

Sawrkarin agency 44 zinga 29-te license a sutsakte hming

S/N Agency hming A neitu hming

1. Talmud Employment Agency - Lalbiaksangi

2. Empleo Agency - Nancy Vanlalhriatrengi

3. Z.R. Recruitment Agency - Laltlanchhungi

4. Faith Agency - C. Lalhriatpuia

5. Grace Employment Agency - Lalchawimawii

6. Kairos Employment Agency - Amilie Lalnunfeli

7. Sangtei Agency - Hmangaihsangi

8. Emmanuel Consultants - Rocy Lalnunsangi

9. C & L Employment Agency - Varhlunthangi

10. En-Hakore - Lalnuntluanga Hnamte