ZALEN August 28, 2026: Serchhip Police Station chuan May 2026 thla tira RTO E-Challan click avanga buaina case engemawzat an dawng a, an zinga mi pahnih R. Lalchhandama bank account (Slice Small Finance Bank Serchhip) atangin Rs.13,92,000 leh Robert Zoremmawia te bank account (MRB) atangin Rs.2,09,000 an laksak te chu engemawzat an hmuh let sak.

Hetih hunlai hian ICJS account re-activate dilna an process mek lai anih avangin NCRP Portal access theih a ni lo a, Cyber Criminal-te pawisa tihchet lamah an tuan a ran avangin, hetih hunlaia OC, Serchhip PS Inspr. R. Lalbiakhlua chuan buaipui-in, chak takin victim-te hma a lak pui a. phone call leh a theih ang anga hmala in case hi a bawhzui a ni. 

Serchhip Police te hian R. Lalchhandama pawisa hi Ram Jeevan Shah nia hriat account (Bank of Maharastra, Mumbai) leh account dang 2 rinhlelh ah a lut niin an hria a, Robert Zoremmawia pawisa luhna hi Punjab National Bank, Jhanjharpur Bihar a ni tih hriat a ni bawk a, heng account rinhlelh te hi freeze nghal an ni.

Heng account freeze atanga pawisa lalet leh tur hian Court Order a ngaih avangin Serchhip District Court lamah requisition vawi 3 dil a ni a, requisition te hi Bank of Maharastra leh Punjab National Bank lamah soft copy leh hard copy a thawn in, Bank lam Ukil ten an pawm hnu ah account freeze te atang hian tun thla August, 2026 chhung hian R. Lalchhandama pawisa bo Nuai 13,92,000 atangin Rs.9,12,707 chu Ram Jeevan Shah account ni a hriat atang hian lak let leh niin, account dang 2 rinhleh te pawh hi enzui a vil zui mek an ni. 

Robert Zoremmawia pawisa bo Rs.2,09,000 atang hian Rs. 1,59,627 te laklet sak leh a ni bawk. 

Serchhip Police Station hian RTO E-Chalan Scam chungchangah hian mipui zirtirna video clip te siam in Social Media ah te an thehdarh a, hetihlai hian RTO E-Challan Scam avang hian case engemaw zat neiin, he thil avang hian phone engemawzat set thatsak te pawh an lo nei tawh bawk a, Scammer-te hian sum tam tham deuh bitum bik an neih thin avangin sum bothlau erawh an tam vak lo niin an hria. 

Scammer hi an pung tulh tulh dawn a, link hriatchian loh hmeh mai mai te, sum peipunna sang lutuk te, leh online hmanga sum hmuh awlsamna lutuk lakah hian mipuite pawh fimkhur a tul hle an ti.