American actress Julia Roberts chuan film a chan tawh hrang hrangah ruaka inlan a duh ngai lo tih a sawi chhuak. Kum 56 mi lai ni ve tawh Julia Roberts hi kum 1990 chho khan 'Pretty Woman' ah inlanin, a lar thin vet vet hle. 

Lemchan khawvelah kum 35 vel zet a cheng ve tawh a, mahse hetih chhung hian ruaka inlan chu a thil duh loh ber zinga mi a ni ve tlat. Lemchan thiam tam tak hi chu ruak thaw thanga an inlan thin avanga lar an ni nawk a, hetih rual hian ruaka inlan duh miah lo sawi tur an awm teuh bawk. Chung zingah chuan Julia Roberts pawh hi a tel a, "Ka film career-ah ruaka inlan lo turin thu tlukna ka siam a ni," tiin a sawi chhuak mauh mai. 

Tun hnai khan hemi chungchang hi British Vogue ten an interview tumin a sawi chhuak a, taksa lang tam zawnga inlan turte pawhin an lo sawm tawh thin a nih hmel hle. Mahse hemi kawngah hian rilru a siam fel a, a career chhungin ruaka inlan a nei lo. 

Julia Roberts hi Richard Gere nen 'Pretty Woman' ah khan an chang dun thin a, a lar chhuahna pawh a ni. Hemi hnu hian film hrang hrangah a inlan zui a, sulhnu ropui tak a hnutchhiah a ni.