Canadian fashion model lar Linda Evangelista chuan teenager a nih laiin ruaka thla la tura nawrh luihna a tawh thu tun hnai khan a sawi chhuak. British Vogue magazine chuan September cover girl atan Linda Evangelista hi an hmang a, interview-ah he mi chungchang hi a sawi chhuak a ni. 

Super model thin Linda Evangelista chuan, "Predatory Modeling Agency ten contract min offer a, mahse ruaka thla la tura min nawr luih avangin ka lawm lo hle. He tih hun lai hian kum 16 mi chauh ka la ni a, ka pawm thei loh avangin Japanese agency hi ka chhuah san leh nghal a ni," tiin a sawi. 

Kum 57 mi lai ni ve tawh chuan sawi zawmin, "Ka thlen khan tumah min rawn ngaihventu an awm lo a, cell phone ka neih bawk si loh avangin ka bo hle. Agency ka thleng chu inphelh ruak turin min ti a, ka measurement an nei sa vek chungin lak a ngaihthu min hrilh. Ruaka thla la turin min tizui a, mahse chu chu kan inbiaknaah a tel si lo. Ka chhuak a, ka nu ka be pawp nghal a, ani chuan haw dan tur ngaihtuaha embassy pan nghal turin thurawn min pe a ni," tiin, modeling a luhchilh tirha a harsatna tawh a sawi chhuak. 

Linda hi a hun lai chuan khawvela supermodel lar ber zinga mi a ni a, kum 1990 khan a career hi a chawlhsan. Magazine hrang hrang tan cover-ah tum 60 zet a inlan hman a, kum 30 zet liam hnuah British Vogue tan a rawn inlan leh dawn a ni.