Aizawl: Mizoramah Persons with Disabilities (Equal Opportunities, Protection of Rights and Full Participation) Act, 1995 hman a nih hnuah rualbanlo 30-in sawrkar hna an hmu tawh. Mizoram sawrkarin Persons with Disabilities Commissioner atana a ruat Dr. Lalnunthara hnen atanga Zalen thudawn danin rualbanlote tana sawrkar hna 3% hauhsak chu Mizoram sawrkar chuan a kalpui tha thawkhat nia a hriat thu a sawi a, tun hnaiah dan neih mek hi siam thain PwD Act, 2016 ang chuan hna hauhsak hi 4% ah tihsan a ni tiin hei pawh hi department lamin an hmang tha em tiin a tul angin bawhzui mek a ni tih a sawi bawk. Dr. Lalnunthara chuan sawrkar office, zirna in leh mipui punkhawmna hmunah te chuan rualbanlote kal vena tur ‘ramp’ a awm ngei ngei tur (mandatory) a ni tiin hei hi mi thenkhat hrechiang tawk lo an awm avangin inzirtir thar a ngai hle nia a hriat thu a sawi a. Rualbanlo te pawh mipui vantlang zinga an tel ve theih chu sawrkar laipui duhthusam a ni tiin ngaih pawimawh thar nise a duh tih a sawi a. Building thenkhatah chuan ramp te an siamsak bakah lift te an siam thar niin a sawi bawk. Kum 2011 chhiarpui atanga a lan danin Mizoramah pianphunga rualbanlo 15,160 an awm mek a, hei hi mipui cheng atanga chhutin 1.3% a ni a, rualbanlo zinga 8627 hi thingtlanga cheng an niin a dang 6533 hi khawpui a cheng an ni. Rualbanlote tan hian ID Card siamsak thin a ni a, 2015-16 thleng khan mi 10,407 (68.64%) hnenah ID Card hi pek a ni tawh a ni.