Aizawl: Mizoram Legislative Assembly Inthlanpui lo awm tur inpuahchahna kal zelah nimin khan rualbanloten vote an thlak ve ngei theih nana cho phurna kawngzawh programme “March with Pride” chu Aizawl DC Office kaihhruaina in buatsaih a ni a. Vanapa Hall kawt atangin Chief Electoral Officer SB Shashank chuan a vai liam a ni.   Tum danga la tih ngai loh kumin inthlanah hian pianphunga rualbanloten vote an thlak ngei theihna turin sawrkar chuan tan a la nasa hle a. India khua leh tui, kum 18 tling chin apiangin vote an thlak ngei theihna turin infuihtharna leh inhrilhriatna programme eng emaw zat Systematic Voters’ Education & Electoral Participation (SVEEP) hnuaiah a buatsaih a. Rualbanlote Electoral Roll-a an hming a chuan leh chuan loh endik a ngaih avangin Social Welfare Department nena tangkawpin vote nei thei si la inziaklutlo an awm leh awm loh zawn chhuah hna an thawk bawk.   Addl.DC Dr. Vanlalhriati Ralte sawi danin Aizawl District huamchhungah Person with Disabilities (PwD) Voters mi 1550 an awm a ni.   Vote thlak ni, November 28-ah pianphunga rualbanloten vote an thlak theih nan an in atanga Polling Station thlenga hruai thei tur leh vote an thlak zawha an ina dah leh tur lirthei ruahman sak an ni dawn a. Wheelchair leh zakdawh tiang hmanga an luh theih nan Polling Station tinah leilawn (ramp) dah a ni bawk ang.   Mitdel tan mitdel hawrawp Braille-a ziak EPIC card siam turin hma lak mek a ni a, candidate an duh tak an vote theih nan Electronic Voting Machine pawh dapa hriat mai theih turin chhut pawn a ni dawn a ni. Bengngawng, tawngtheilo ten harsatna an tawh loh nan Polling Station-a official duty tur zawng zawng te chu sign language expert ten training an pe vek dawn a. Mitdel ten an serial number an hriat theih nan Braille hmanga ziak dummy ballot sheet pek an ni dawn bawk a ni.   Vanapa Hall kawta programme tawi buatsaihah hian Aizawl DC Dr. A.Muthamma leh mi pawimawh dangten thu an sawi a. Hemi zawhah hian Lammual lam an pan khawm a, cultural programme buatsaih zui leh niin Addl.DC. Dr Lalhriatzuali Ralte,IAS chuan hawnna thu a sawi a. Person with Disabilities District Icon pahnih Vanrammawii leh Lalbuatsaiaha te pawhin tun tum inthlanah rualbanloten vote an thlak ngei theih nan fuihna thu an sawi bawk. &&&&&