Aizawl: Nizan hmasa dar 10:30 vel khan Falkland veng, World Bank Road ah ruang pahnih chhar a ni a, post mortem an nih hnuah nimin khan vui an ni. Bawngkawn Police Station atanga Zalen thu dawn danin Lalrinfela (37) s/o Vanlalsiama Armed veng South, tunhnaia a u te hnen Falkland venga cheng chu kawng thlangah a tla a, a hliam tuar lovin a boral nghal a, a thiannu in hliam a tuar a, Aizawl Civil hospital panpui nghal a ni. Thu dawn danin Lalrinfela leh a thiannu lengdun hi inhmu thiam lovin Falkland world bank road-ah hian an in um a, kawng thlangah an tla dun a, Lalrinfela hian a lu a sawh a, hmeichhia hi a ngal ruh hmun 2 ah a tliak a, ngaihtuahawm erawh a ni lo. Zirtawp zan vek dar 10:30 vel khan Falkland veng huam chhung, Zemabawk lam atanga World Bank Road a kala Falkland Presbyterian Biak In thlen hma deuh kawng bulah mipa ruang chhar a ni a. T-Shirt dum a ha a, kekawr gray color hain, Sneaker var a bun bawk a. A tirah chuan tunge anih hriat a ni mai lova, mahse a hnu deuhah Chawngthanmawia (36) s/o Lalhmuaka (L) Zemabawk Middle school veng a ni tih hriat a ni a, a thih chhan hriat a ni lova, a taksa ah hliam hnu hma hmuh a ni lo.