ZALEN September 15, 2024 : Mizoram sawrkarin September 2024 atanga ruang phurhna rate a bituk chu ruang phurtu 'Ambulance' te rate hman lai nen a inan loh avangin sawrkar leh ambulance neitu ten hun remchang hmasaah an sawiho leh dawn.

ZALEN zawhna chhangin Social Welfare and Tribal Affairs Minister Lalrinpuii chuan, "Ruang phurhna atan hian State Transport Authority in rate a siam ang leh ruang phurtu ambulance rate a inan loh avangin kan rate siam ang hian an tlan thei lova, chuvangin remchang hmasa berah sawiho kan tum a ni," a ti.

Mizoram Private Ambulance Association (MPAA) President CVL Ngheta chuan, "Ruang phurhna rate chungchangah hian Minister dawr kan tum a, mahse a zin avangin kar thar lamah hian dawr chhunzawm kan tum a ni," tiin ZALEN a hrilh a. Sawrkar rate siam ang chuan an tan tlan ngaihna a awm lo tih sawiin tun dinhmunah pawh anmahni rate siam km khata Rs. 40 (a let lehna nen Rs.80) in an la tlan zel niin a sawi bawk. Tun dinhmunah Mizoram Private Ambulance Association (MPAA) ah hian member 13 an awm mek a, an vai hian Aizawl khawpuia khawsa vek an ni.

Social Welfare, Tribal Affairs, Women & Child Development Department in ruang phurhna atana ruahmanna a siam dan chuan lirthei nuai 7 hnuailam chu km khatah Rs. 25, nuai 7 atanga nuai 12 inkarah Rs. 30 leh nuai 12 atanga 17 inkarah Rs. 35 te a ni a. Lirthei nuai 17 chuang man chu man chawia ruang phurhna atan STA chuan hman a remti lo a ni. Hetih lai hian ambulance hi km khatah Rs. 80 (up down) in an tlan mek a ni.