ZALEN Feb 23, 2026: Kolkata-a Mizo awmte chuan an chenna khawpuia Mizoram ruang phurh haw ngaite senso chhawk nan sorkarin Mizoram chhunga a hman mek, ruang phurhna senso a tumsak thin ang chu hman ve theih se an duh tak zet tih an sawi.

West Bengal khawpui tlawha IPR Department buatsaiha zin mek, Mizoram Journalists’ Association (MJA) member-te nen Pathianni tlaia an inkawmnaah Kolkata Mizo Welfare Association (KMWA) hruaitute chuan ruang thawn hawna senso chungchang hi an sawi.

Kolkata chu Mizoten ram chhung leh pawn hmun dang an tlawh dawna an chhuahka a nih piah lamah damlo inentir an tam em em reng tih an sawi a. Heng zingah hian ruang nena haw ngai an awm fo thin a, tih tur tul hrang hrangte an buaipuisak thin tih an sawi.

KMWA President C Lalmuanzuala chuan, “Thlawhnaa ruang pakhat phurh hawna man bik chauh Rs. 15,000/14,000 vel sen a ni thin a, ruang sawngbawlna leh tul dang zawng zawng chu Rs. 40,000/50,0000 vel zet a ni thin a; rei tak damlo inenkawl tawhte tan a hautak lutuk thin a ni,” a ti.

Kolkata Mizoram House Joint Residence Commissioner Zoremthara Ralte-in New Town Mizoram House-a zanriah a buatsaih an kilho paha an inkawmnaah hian August, 2025 atanga tun thlengin ruang 15 thawn an ni tawh tih an sawi bawk.

Mizoram sawrkarin tuna ruang phurhna man a tumsak thin hi September ni 1, 2024 atanga hman tan kha a ni a, Mizoram chhunga phurhna bakah chuan Silchar atanga phurhna chauh a huam a ni.

MJA member pakua leh IPR Dept mi pahnihte hi Inrinni tuk khan IPR Director K. Vanlalsangi’n a pisa tual atangin a vai liam a, Ningani hian Aizawlah an let leh dawn a. An cham chhungin Kolkata-a hmun pawimawh leh langsar an tlawh mek zel a ni.

#ZalenNews