Mizo rawlthar rit chawi chak, Lalruatfela chuan Commonwealth Junior Weightlifting Championships neih mekah silver medal a la.

Fiji khawpui, Suva-ah Commonwealth Weightlifting Championships Youth, Junior leh Senior neih mekah hian Bungzung tlangval, Ruatfela hian snatch-ah kg 135 leh clean & jerk-ah kg 166, a vaiin kg 301 chawiin kg 89 huangah silver medal a la.

He huangah hian a thlengtu ram rit chawi chak, Elder Nehemiah chuan snatch (kg 141) leh clean & jerk (kg 172), a vaiin kg 313 chawiin gold a la a. Ruatfela hnuaiah hian India aiawha inlan dang, Das Hrudananda, a vaiin kg 299 chawitu chuan bronze medal a la thung.

Junior-a an chawi zat hi senior-ah rintir nghal zel niin Ruatfela hian medal a la phak ta lo va, 5-na a ni a. He huangah hian junior-a Ruarfela tluk loh, Nehemiah chuan silver medal a la phak thung.

Suva khawpuia inelna neihah hian Indian Weightlifting Federation (IWF) chuan ritchawi chak 21 a tir a, an zinga pakua hi hmeichhia an ni.

Mizo ritchawi chak, Ruatfela hi kum 2019 khan Mizoram Weightlifting Academy, Ramhlun Sports Complex-ah Zohmangaiha, Mizoram State Sports Council (MSSC) Weightlifting NIS coach atanga inzir chhuak niin April, 2023 khan National Centre of Excellence (NCOE), Patiala, Punjab-ah training turin an thlang a. Tun thlengin Patiala-ah hian national camp-ah la awm awmin Inrinni khan inelnaa inlan turin India an pan.

Ruatfela hian nikuma Noida, Uttar Pradesh-a India-in Commonwealth Youth Weightlifting Championships a thlen khan kg 81 huangah India tan gold medal a lo la tawh a, kuminah hian a aia huang puitling zawkah a inlan zui leh dawn ta a ni.

India ram chhung bikah pawh medal a lo la nual tawh a. Nikum vek khan Madhya Pradesh-a 5th Khelo Youth Games-ah leh Sub Junior National Championship, Arunachal Pradesh-ah kg 81 huangah silver medal ve ve a la.

Kum 2022 khan Shillong, Meghalaya-a North East Games-ah leh Tamil Nadu-a Sub Junior National-ah gold medal ve ve a la tawh bawk.