ZALEN October 24, 2023 : MPCC Treasurer Dr. Lalmalsawma Nghaka chuan MNF Adviser Lalruatkima'n October 21, 2023-a press conference a neiha an party manifesto 80 percent ti hlawhtling tawh anga a sawi chu thu belhchian dawllo leh mipui rilru hruai kawi tumna mai anih avangin a nihna dik tak puan a tul a ti.

Chanchinthar lakhawmtute a kawmnaah Dr. Mala chuan MNF Party Manifesto chungchang sawiin, "MNF’s flagship program Social and Economic Development Program(SEDP) hi 2018 inthlan dawn khan kan hre tam hle a, an tawngkamah phei chuan NLUP dawng tawh te pawh huam vek tur a ni a, an hotupa phei chuan chhung tinin cheng nuai 3 an dawn tur a sawi nasa hle. Tun dinhmunah SEDP first phase hi chhungkaw 60,000 hnenah Rs. 50,000 pek an ni a, hei hi nuai thum atanga chhung chuan 16% chauh an dawng tihna a ni," a ti.

Second phase-ah chhungkaw 60,000 hnenah Rs. 25,000 theuhin first instalment an pe a, heihi an tiam nuai 3 atanga chhut chuan 8 percent vel an dawng ve hram a ni. Third phase tur membership drive leh campaign fund atana an hman tum kha chunglamin a remti lo aniang chu. MCC puan anih avangin an che thei ta lo a ni, a ti. Hemi atang ringawt pawh hian an manifesto 80% an tihlawhtlin loh tih a lang, a ti bawk.

MPCC Treasurer chuan SEDP Board chungchangah zawhna siamin, "MNF party hian SEDP Board mak tak tak 14 an din a. Vice-Chairman leh members atan thiam thil bik nei em em pawh nilo party mi duhsak zawng an in ruat teuh mai a. Board tin hman tur vehicle 2 theuh support staff nen pek an ni. Hemi atan hian thlatin cheng nuai 37 hman ral niin kum khatah cheng nuai 444 khawral anga chhut a ni. Heng SEDP Board te hian eng hlawhtlinna nge an neih tih mipuite hian hriat an chak khawp mai," a ti bawk.