ZALEN January 15, 2026: Land Resources, Soil & Water Conservation Department chuan vawiin khan Mizoram Chief Minister's Rubber Missions hnuaia rubber chingtute tan Rubber chin dan, a seng dan leh a seng hnua a sawngbawl zui dan leh a kung enkawl dan zirna Vanapa Hall-ah a buatsaih a. Hawnna inkhawm telpuitu Chief Minister Lalduhoma chuan Mizoram chu rubber tharchhuahna hmunpuia chantir tum a nih thu a sawi.

Rubber enkawl dan lehkhabu a tlangzarh zawhah thusawiin Chief Minister chuan, "UT kan nih ata kum sawmnga kan pel tawh a, loneia eizawng kan tam chungin eng thlai mah hi ka hmingthanpui ngai lo. A thlan tla nasa, a kut durh nasa te hi kan rethei em em thin. Mipui sawrkar kan han ding a, kan Policy te kan han tipuitling chhova, hun reiloteah Ginger Capital of Indiaah min puang ta a ni."

"Sapthei pawh hi kan larpui theih, kan rama thlai tha duh tak a ni. Kan hmingthanpui theih thlai tha ber pakhat chu rubber hi a ni a. Kan ram hi Rubber tharchhuahna hmunpuia chantir tumin Chief Minister Rubber Missions kan duang chhuak ta a ni. He missions hi mawlmang takin kal kalpui lova Rubber Board of India te nena uluk taka kan sawiho hnu leh Tripura Rubber Missions kan zirchian hnua kan kalpui a ni," a ti.

Chief Minister chuan a tira an ruahman aia nasain hma an la niin a sawi a. A chhan pawh rubber ching duh an tam vang a ni a, thil lawmawm lam a ni. In hlawhtlin ngei theih nan sawrkar chuan a tih turte a ti zel dawn a, a chingtute pawhin theihtawp an chhuah an beisei tih kalkhawmte hi a hrilh.

Lalduhoma chuan, "Ti ve mai mai tan hlawhchham theih a ni a, rubber la ching ngai lo tam takin in ching thar dawn bawk si a. A tih dan engkim hi in thiam a ngai a. He training hi tha takin in lo ngaithla dawn nia. Sawrkarin in banah kan kai dawn che u a, kaih tlak ni ngei ang che u," tiin a fuih.