Aizawl; Central YMA President R. Lalngheta’n Central Anti Drugs Squad (CADS) anga YMA an chetchhuahna atanga an hmuh danin Mizorama ruihhlo hluar lutuk chu a manganthlak takzet tih a sawi a, a lo luhna lai bawrah sawrkar a tan nat lehzual a ngaih thu a sawi a. Hetihlai hian kumin January thla khan Mizoramah ruihhlo vanga thi mi 15 zet an awm.

ZALEN-in a biaknaah R. Lalngheta chuan CADS-ten ruihhlo an mansak zingah Burma raltlan an awm mang tawh lo tih sawiin, chu chu anmahni zalenna sualtu lam PDF etc. an tan vangte pawh nia an hriat thu a sawi.

“Khi lam atanga ruihhlo rawn lut a tam hrim hrim a, sawrkar pawh a lo luhna lai bawra a tan nat zual a ngai khawp mai, helai a a darh tawh sa lo zawn chu a harsa,” tiin, “Ruihhlo zuar leh ti man tur an tam em em reng a, a hluar/tam lutuk hi a manganthak takzet a ni,” a ti bawk.

R. Lalngheta sawi danin Central YMA hnuaia ruihhlo dotu, CADS chu kalpui chhunzawm zel tum a ni a, tun kar chhoah 3rd batch tur tihfel theih beisei a ni.

CADS hmalakna mipuiin an thlawp tha a, Synod-in ni 20 chhung zel revival team a inchhawka pein, chung team-te chuan an mi mante rawngbawlna an neihpui thin.

Excise & Narcotics Department chhinchhiah danin kumin January thla khan Mizoramah ruihhlo vanga thi mipa 13 leh hmeichhia pahnih (mi 15) an awm a, chung mite chu heroin vanga thi vek an ni.

Nikum chhung khan ruihhlo vanga thi mi 43 (mipa 39, hmeichhia pahnih) an awm a, data atanga a lan dan leh ruihhlo hluar mek dan thlirin kumin ah ruihhlo vanga thi an tam dawn niin a ngaih theih.