ZALEN May 11, 2026: Vawiin khan Tawngtai Bethel Camping Centre (TBCC), Sakawrtuichhun-a in sak thar, 'Josepha Room' chu Food, Civil Supplies & Consumer Affairs Minister B. Lalchhanzova chuan a hawng. He hunah hian CYMA President R. Lalngheta chuan ruihhlo do kawngah 'hmangaihtu der' an chhuah thin avangin mipui an mangang thin tih a sawi.

He hun hi Central YMA Vice President, Prof. Lalnuntluanga’n a hruai a. In sak thar hawnna neih a nih hnu hian Pathian hnena hlanna neih zui nghal a ni. He hunah hian Prof. Malsawmliana, Gen. Secretary, Central YMA-in inhmelhriattirna neiin, Er. H. Duhkima, Treasurer, Central YMA-in Josepha Room sak a nih dan report a pe a. In sak thar Pathian hnena hlanna leh tawngtaina hun hi Pastor Lalremruata, PCI Sakawrtuichhun-in a hmang.

He hunah hian TBCC Founder Zohmingthanga bakah Central YMA President R. Lalngheta leh khuallian B. Lalchhanzova, Minister te hnen atangin thusawi pawimawh tak tak ngaihthlak a ni.

Central YMA President R. Lalngheta chuan ruihhlo laka harsatna tawk mekte chu "drugs addict tura piang bik in ni lo" tiin an dam leh thei a ni tih hria a, rilru fim nen ngaihtuahna thar hmang turin a chah a; ruihhlo do kawngah 'hmangaihtu der' an chhuah thin avangin mipui an mangang thin tih sawiin, kuminah Pathianin boruak thar tha zawk min pek lai hian Central YMA chuan ruihhlo bawih a tang mekte chhanchhuah nan theih tawp chhuah an tum thu leh, khawvel dam chhung reilo teah midangte tana malsawmna ni tura rawn chhuak turin a fuih a ni.

Food Civil Supply & Consumers Affairs Minister B. Lalchhanzova chuan Tawngtai Bethel Camping Centre (TBCC) awm mekte hnenah ruihhlo avanga Mizoram a rum laia Central YMA leh TBCC founder Zohminga te chhungkua in a langsar lo lama rawngbawlna hlu tak an thawk chu fakawm a tih thu a sawi a; TBCC-a ruihhlo laka harsatna tawk mek mi 560 velte fuihin, he ram hian a mamawh avangin chhia leh tha hriatna hmang tur leh, a der tal pawha felna atanga bul tana nungchang thlak tlat turin a chah a, Supply Department leh WIC Scheme atangte pawha theihtawp a lo chhuahpui a tum thu a sawi bawk a ni.

In sak thar hi “Joshepa Room” tiin a hming vuah a ni a, a dung Ft 60 leh a vang Ft 24 a lian a ni a, hei bakah hian Choka, Inthiarna leh Venbuk 2, infiamna tur kawt zawl zau tak a awm bawk a. Rs. 13,59,822/- sen a ni. Hemi bakah hian In dang 2 sak leh a ni ang. In sakna hi Chief Minister, Home Minister leh Excise Minister te ruahmanna atangin Sawrkarin a tum a, Central YMA in a sak hna a thawk a ni. 

Tunah hian TBCC ah hian mi 673 an awm mek a ni.