Aizawl: Aizawl DC Office in a kalpui mek naupangte ruihhlo laka an himna tura hmalakna Project HIMNA-MADAT (Mizoram Against Drugs, Alcohol and Tobacco) chu kalpui mek a ni. Project HIMNA-MADAT hnuaiah hian Aizawl District chhunga sorkar Middle School 227-ah naupangte ruihhlo laka an himna atan hma lak mek a ni a. School pakhatah nodal teacher pakhat zel ruat niin Headmaster leh Nodal teacher te kaihhruaina hnuaiah Himna Club din a ni, school naupangte chu club member an ni. Himna Club hian an school chhunga ruihhlo dona kaihhnawih campaign te neiin, COPTA Act zawm a ni em tih te an enfiah a. Ruihhlo dona atana campaign na ni pah fawmin intihsiakna buatsaih a ni bawk. Project HIMNA-MADAT hnuaiah hian zirlaibu Module buatsaih niin Hei hi school session tharah chuan zir theih beisei a ni bawk. He zirlaibuah hian naupangte nun kaihruai tur thil te, ruihhlo hlauhawm zia te leh thil pawimawh hrang hrang an kum mil zela zir tur  dah a ni a. Zirlaibu chhung thute hi zirtirtuten an zirtir thiam theih nan training pek chhoh mek a ni bawk a ni. Research atanga hmuhchhuah pakhatah chuan naupangten ruih tur an hmuhna lian ber chu damdawi zuar te atangin a ni. Hemi enfiah tur hian Anti-Drug Squad siam nghal a ni bawk. Chhuan lo awm zel tur te chu ruihhlo laka filhlim leh hrisel tak an nih theih nana he Project tan a ni hi thil lawmawm tak a ni a, hlawk taka hman tangkai a nih theih nan Project hi kal zel se a duhawm hle a ni. Project HIMNA-MADAT hi June 21, 2017 khan bul tan niin, Vaihlo, Zu leh dawidawi ruih theih laka thalaite an fihlim theih nana zirlai an nih lai atanga  zirtirna tha pek hi a tum ber a ni. Kum 2017 khan Aizawl district huam chhunga school 50 thlan chhuah niin heng school ah hian HIMNA-MADAT Project hi kalpui a ni a. Tunah hian he project kalpuina Upper Primary School 277 awm in hengah te hian HIMNA Club din vek a ni tawh bawk. HIMNA-MADAT project ah tan hian  Aizawl DC kaihhruaina hnuaiah Health, Education, Social Welfare Department te leh NGO hrang hrang te nen thawhhona neih a ni bawk.