ZALEN Oct. 14, 2025 : Excise & Narcotics department thuchhuah tarlan danin, Operation Jericho kalpui mek vangin ram pawn atanga Mizorama ruihhlo lut a tlem phah.

An thuchhuah a tarlan a nih danin, September ni 1, 2025-a Home Minister, K. Sapdanga hova bultan, Mizoram ruihhlo lut tur dona beihpui, Operation Jericho kal mekah Mizoram Police, Excise & Narcotics department leh CYMA hnuaia Branch hrang hrang leh khawtlang hruaitu hrang hrangten thahnem ngai takin ruihhlo do beihpui thlakna hi an kalpui mek zel a. Hun dang aiin ram pawn lam atanga ruihhlo lo lut pawh a tlemin, ruihhlo lo lut chhun man pawh a san phah hle a ni.

Operation Jericho hnuaiah Mizoram Police leh ramri hrula awm khuaten ramriatanga ruihhlo lo lut tur dona theihtawpa an kalpui mek lain, Excise & Narcotics Department lam pawhin ruihhlo hmangsualtute laka mipuite an him zawkna turin Mizoram khawpui hrang hrangah City Patrolling uluk takin an nei bawk.