Aizawl June 16, 2024 : Social Welfare, Tribal Affairs, Women & Child Development kaihhruaiin June 26, 2024-a ‘International Day Against Drug Abuse & Illicit Trafficking’ hman dan tur chu Zirtawpni khan Secretariat Conference Hall-2, MINECO-ah relho a ni a. Kumina thupui tur atan ‘The Evidence is Clear : Invest in Prevention’ (‘Kan dinhmun a chiang e : Invenna kawngah tan i la ang u’) tih ruat a ni.

Organising Committee thutkhawmnaah hian sawrkar line department hrang hrangte bakah 23rd Sector Assam Rifles, BSF, Central YMA, MHIP General Headquarters, Mizoram Drug User Forum leh FINGODAY aiawhte an tel kim hle a. Meeting hawnnaah Secretary, SWTA,W&CD Sangchin Chinzah chuan kumtin he ni hman thin chu kuminah pawh a huam zau thei ang bera hman a, ruihhlo lakah inven pawimawhzia chu naupang, thalai leh mipuite uar taka zirtir a pawimawh hle tih a sawi.

Kumin June 26-a ‘International Day Against Drug Abuse & Illicit Trafficking’ hman tur hi Aizawl leh District zawng zawngah hman nise tih rel a ni a. A hmanna tur pui ber Aizawl-ah chuan Vanapa Hall-ah hman a ni anga, he hunah hian Mizoram Chief Minister Lalduhoma chu khuallian atan beisei a ni. Aizawl District chhunga De-Addiction Centre 6 awmte hnenah Nasha Mukht Abhiyan atangin he ni puala hun an hman ve theih nan Rs. 10,000 theuh pek a ni ang. District tinah Ruihhlo Do Committee te chuan an remchan anga he ni puala hun hman ve a, an District chhunga Drug Treatment Centre-te, Jail leh MSACS enkawl lai Home-te tlawhchhuah tum a ni bawk.

June ni 26 zingkarah Assam Rifles-te huaihawtin International Day Against Drug Abuse & Illicit Trafficking pualin ‘Walkathon’ neih a ni dawn a. Excise & Narcotics Department leh Mizoram Police te pawhin chawhnu lamah he i pual hian hun an hmang dawn a ni.