Aizawl July 5, 2024 : Mizo Hmeichhe Insuihkhawm Pawl (M.H.I.P) General Headquarters in kum 50, Golden Jubilee an tling ta chu tlawmngai pawl Foundation For Drug-Free Mizoram chuan lawmpuina Citation an hlan.

Pawl aiawhin an President V. Lalnunthara (Mathara) chuan lehkha thawnin; Mizote history ziaka dah hmasatu Shakespear-a khan Mizo hmeichhia te chu an hmel a chhia, an te bawk. An mipa te an lian a, an hmeltha zawk a lo ti a. Kum 100 a ral leh chuan a inlet ta hlauh a ni tiin Mizo hmeichhiate dinhmun chawikana awm ta chu M.H.I.P hnathawh tih loh rual a ni lo a ti.

Kohhran huangchhungah pawh hmeichhiate sulhnu ropui tak chu The Salvation Army hmuchhuaktu General William Booth-a meuh pawhin hmuhhmaih lovin 'Ka mi tha ber ber te chu Hmeichhia te an ni' a lo ti hial tiin Foundation For Drug-Free Mizoramin Mizo tleirawlte ruihhlo laka venhna an thawhna ah an chakna hnar chu Mizo hmeichhiate an nih thu leh an pawl member zingah za a 70 chu hmeichhia an ni a ti.

Tiranga leh shikhar do atanga tanin ruihhlo do kawngah MHIP member te an thawhhlawk hle tih a tarlang a, an pawl nen thawhhona tha an neih chhoh zel a beisei tih ziakin; India rama danglamna thlentu Chipko Movement chu hmeichhia te hmalakna ni lo se, a hlawhtling kher ang em tih sawi a har tiin Ruihhlo tel lo Nun Duhawm Zawk tih thupui hmanga an tlangau mekna ah pawh Mizo hmeichhia te phur taka an lo tel chu an chakna hnar leh hlawhtlinna anih thu lehkha ah hian an tarlang.

Hmeichhe khawsak ve lohna chhungkua chu a ruak thin, a ti a. Foundation For Drug-Free Mizoramah hian member 1,130 an inziaklut mek a. Chung zinga 800 chu Hmeichhia an ni.