DOWNLOAD OUR APP

Read latest news on your phone
app-store

Ruihhlo lalpa El Chapo fapa man naah mi 29 thi

Jan 08, 2023

Mexican drugs kingpin, ‘El Chapo’ tia an sawi mai thin fapa man tuma beihpui thlaknaa thi chu mi 29 vel an ni ta tih Mexican thuneitute chuan an sawi.

Tunge Guzman Lopez

Guzmán-López-a hi kum 2019 khan Mexican thuneitute chuan an lo man tawha; mahse, amah thlawptuten tharum nasa taka an thawh zui avangin chhuah a ni.

US State Department chuan a unaupa, Joaquín-a pawh a pa enkawl thin pawlah hotu lian tak a ni mek niin an sawi a, an unau hian Sinaloa-ah methamphetamine lab 11 vel enkawlin thla khatah 1,300- 2,200kg (3,000-5,000lb) vel an siam chhuak niin an sawi.

Guzmán-López-a hian a chin sawitute leh ruihhlo tawlhtu dangte a thahtir nasa niin an sawi a. Nupui a neihnaa zai duh lo Mexican zaithiam lar pawh a thahtir nia hriat a ni bawk

Mexican drugs kingpin, ‘El Chapo’ tia an sawi mai thin fapa man tuma beihpui thlaknaa thi chu mi 29 vel an ni ta tih Mexican thuneitute chuan an sawi.

Kum 32 mi, Ovidio Guzmán-López hi a pa lo kaihhruai tawh thin, Culiacán-a ruihhlova sumdawng pawl (cartel) lian tak enkawl zuitu nia hriat a ni a, man a nih hnuah Ningani khan Mexico City panpui nghal a ni.

Man a nih dawn leh a hnuah a pawla mite leh mantute nasa taka inbeiin sipai 10 leh a pawla mi nia hriat mi 19 an thi.

Gang member tawrawt tak takte chuan kawngpui an dang a, lirthei eng emaw zat an hala, tual chhung thlawhna tumhmun an bei bawk.

Sipai dang 35-in hliam an tuar a, gang lama mi 21 dang man tel an ni bawk tih Defence Minister Luis Cresencio Sandoval chuan Zirtawpni (India huna zan rei lam) khan a sawi.

A hming lema ‘The Mouse’ tia an vuahsak, Guzmán-López-a hi helicopter-a phurh chhuah  niin khawpui berah hian venhimna khauhna ber tan inah dah nghal a ni.

A pa kaihhruai, Sinaloa cartel hlauhawm leh rawng tak tak enkawl zuitua puh a ni a, an pawl hi khawvela ruihhlo tawlhtu pawl lian bera ngaih an ni.

A pa, Joaquín ‘El Chapo’ Guzmán hi US chuan man mekin kum 2019 khan ruihhlo a tawlh vang leh dik lo taka sum a chelek avangin dam chhung lung in tang tura hrem a ni a. A chungthu an relnaah hian Mexico-a drug cartel-te chetna rawng tak tak pawh hai chhuah a ni.

Guzmán-López man tur hian US thuneitute puihna nen thla ruk zet veh a nih thu Sandoval chuan a sawi.

US hian a lumanah $ maktaduai 5 an chhiar a, a unau dang pathum pawh a pa pawlah hian hruaitu lawk tak tak dinhmun an chelh niin an hre bawk.

Man a nih hnuah hian Mexico-a judge chuan ram danga thawn chhuah tumna a awm lo tih a sawi niin tual chhung chanchinbute chuan an tar lang.

Man tuma beihpui thlakna hi Mexico hmarthlang lama Sinaloa state chhung, Culiacán-ah Ningani zing khaw var hmaa tan a ni a, cartel member-ten tharumin nasa takin an lo chhang let ta a ni.

Ovidio ‘The Mouse’ Guzmán-López man man a to

The Mouse’ tia koh, Guzmán-López-a man man hi a to hle a, mihring tam tak an thih bakah thil tihchhiat leh inbeihna a nasa hle.

Lirthei eng emaw zat hal a ni a, Sinaloa airport-a thlawhna pahnih chu silaia kah a ni bawk a, hengte hi Sinaloa cartel mite tih nia puh a ni a. Thlawhna thlawk chhua leh lut tur 100 chuang thulhtir an ni.

Defence Minister Sandoval chuan Mexican Air Force thlawhna pahnih chu cartel-ten an kah vangin emergency-a tumtir a ngai tih a sawi bawk.

Lei lama beihpui thlaktute pui turin silai nena thuam helicopter eng emaw zat tirh tel an ni.

Mexican President Andrés López Obrador chuan Mexican sipaite hian an mawhphurhna ang taka tiin civil mite himna turin an che a, civilian thi an awm pawh sawi a ni lo.

Inbeihna tawp tawh mah se Sinaloa-ah hian venhim hna thawk turin sipai 1,000 tirh luh belh an ni tawh bawk.

Social media-a video thehdarhah chuan Culiacán-ah hian kawngpuia bus hal khuk hluah hluah hmuh tur a tam hle.

Ningani zingah khan Culiacán atanga Mexico City pan tur thlawhna chu a thlawh chhuah dawn laiin a thlaa vir chu kah a ni tih Mexican airline Aeromexico chuan a sawi.

Customer leh thawktu na an awm lo va. Video an thehdarhah chuan passenger-te chu an thutnaah tawm hniamin thenkhat chu chhuatah an bawk bawk tih a lang thei.

Culiacan Airport hi Zirtawpni atang erawh kha chuan dan pangngaiin a kal leh tawh thung.

Khawpui chhunga thlir tin deuhthaw chu kawgpui dan a ni a, mipuite chu ina tawm tura tih an ni a. Dawr tam tak rawk a ni a, venhim hna thawktu leh gang member inkarah inkahna a nasa hle.

Sinaloa state pumah Zirtawpni khan sikul khar a ni bawk.

Share now