ZALEN September 02, 2026 : Gauhati High Court chuan nimin khan ruihhlo man thubuaia kum 10 lung in tang tur leh Rs. 1,00,000/- chawi tur a Special Judge, NDPS Court, Champhai-in hremna a pek tawh chu a thiat a, he thubuaiah hian thiam a chantir.

Kum 2024 khan Special Judge, NDPS Court, Champhai chuan NDPS Act Section 21(c) leh 25 hnuaiah Lalrosanga chu thiam loh a lo chantir tawh a. Trial court chuan kum 10 chhung lung in tang tur leh cheng nuai 1 chawi turin hremna a pe a ni.

Lalrosanga chuan he thutlukna hi pawm loin Gauhati High Court-ah criminal appeal a thleh lut a. Justice Kaushik Goswami chuan appeal hi pawmsakin, trial court-in thiam loh a chantirna leh hremna a pek chu a tihtawpsak a,thiam chantir a ni. 

High Court chuan a rang lama chhuah zalen a nih ngei nan Release Order chhuah vat tur leh thuneitute hnenah hriattirna thawn nghal turin Registry a hrilh tih thulakna www.jclalnunsanga.in chuan a tarlang.

Thutlukna kimchang inziahna(judgment) hi nimina peih hman a nih dawn loh avangin, Judge-in Court chhungah thiam a chantirna hi a puang a. Tun dinhmunah order tawi chiah a la awm avangin, a kimchang zawkin judgment chhuah hnuah lo dah leh a ni ang.