Aizawl: Central YMA leh Mizoram Synod tangkawp ten Ruihhlo ngaite puala 'Chhanchhuahna Camping' Berawtlanga an buatsaih ah a tawp thlengin mi 176 an awm a, heng mite hian Pathian khawngaihna changin naktuk zing hian camp atangin an chhuak ang. Zalen palaiin Central YMA hnuaia ruihhlo do tura a din SRS hruaitute hnen atanga thu a dawn danin Camp ah hian a tirah mi 348 an lut a, an zingah hian ruihhlo ti nasa tak tak (hardcore) mi engemaw zat an awm a. Heng mite hi tam tak damdawiin panpui an ngaih avang leh thenkhat chu awm peih tawhloa an tlanchhuah avangin a tawp thlenga camp awm hi an tlem ta niin an sawi. Zalen zawhna chhangin ruihhlo ti zinga haw na tur in leh lo neilo te chu Social Welfare Department nen tangrualin Thingsulthliah a 'Pisgah' home ah dah an ni dawn a. Zanin hian camp hun hnuhnung hmangin an nu leh pa leh chhungten an inkhawmpui ang a, remchan dan a zirin Kelkang kalpui leh tum an ni bawk.