ZALEN Sept. 26, 2024; Zu leh ruihhlo ngaite enkawlna hmun hrang hrangah, seat inchan lo khawpin enkawl ngai an thahnem a, hetihlai hian ruihhlo ngai man te chu jail a khung vek sen pawh an ni lo nia thudawn a ni.

ZALEN thudawn danin, Aizawl district chhung ringawtah pawh ruihhlo ngaite enkawlna centre/home 20 vel a awm a, a thente chu mi tam vak lo enkawlna a nih laiin, thenkhat erawh mi sang chuang thleng pawh enkawl thei leh enkawl mek an ni.

Chung home/centre hrang hrangah chuan zu leh ruihhlo ngai enkawl an thahnem em em vek niin ZALEN chuan thu a dawng a, home hrang hrangah seat an inchan lo a, seat ruah hun nghak tura thawktu lamin ruahmanna an siam sak pawh thahnemtak an awm thin.

ZALEN thudawnna pakhat chuan home a enkawl mekte chu thu hran nise, tun dinhmuna khawlai dunga ruihhlo ngai veivak thin te pawh man vek ni dawn se, kan jail neihin an dawl zo dawn lo niin a sawi.

Central YMA hnuaia kumpuan committee te pawhin ruihhlo ngai an man tam berte chu home lamah an dah lut thin a, Excise & Narcotics dept. lam pawhin kumin chhunga ruihhlo ngai an man mi 130 (Mipa 123, Hmeichhia 7) te chu an chhungte hriatpuiin, heng home/centre hrang hrangah hian an dah lut tawh a ni.